Suleimani Ndikumana është një emër i njohur në kampionatin shqiptar. Në sezonin 2014-2015, sulmuesi 32-vjeçar ishte lojtar i Tiranës, skuadër me të cilën arriti të shënonte 12 gola në 42 ndeshje të aktivizuara. Emri i tij është rikthyer të përflitet sërish në futbollin shqiptar, teksa dalëngadalë merkato e janarit po afron.
Potenti i fazës ofensive është një lojtar i lirë dhe kësisoj shumë klube të elitës mund të përfitojnë shërbimet e tij. Për këtë newsport.al kontaktoi vetë futbollistin i cili zbuloi se Kukësi kishte shfaqur interes për të.
“Në qershor të vitit 2019, më kontaktuan nga klubi i Kukësit. Ata më donin në skuadër, mirëpo preferova të qëndroja në ekipin që isha“, thotë fillimisht ai.
I pyetur më pas, nëse e sheh si opsion rikthimin në Superiore, 32-vjeçari duket i pavendosur: “Varet. Nuk mund të jap një përgjigje konkrete. Në fillim dua të shoh kushtet, më tej të vendos“.
Tirana është skuadra me të cilën shkëlqeu. Megjithatë për bardheblutë, Ndikumana nuk dëshiron të flasë. Fillimisht pret ofertat, më tej do të vendosë. “Nuk mund të them asgjë, për sa kohë nuk ka gjë konkrete. Siç ua thashë më lart, vetëm nga Kukësi më kanë kontaktuar. Do të shoh se ç’do të më ofrohet e më tej do të vendos për të ardhmen time“, ka përfunduar ai. /Newsport.al/
Loading ...
