29 maji i vitit 2009-të s’do të harrohet asnjëherë në futbollin shqiptar e veçanërisht nga familja e madhe e klubit të Partizanit. Ajo pasdite me një kohë të mrekullueshme, u shndërrua në ditë ferri për kryeqytetasit që e panë veten të zbrisnin një kategori më poshtë. Problemet e shumta financiare për skuadrën e Partizanit bënë që sezoni të ishte me shumë ulje-ngritje duke bërë që të shkonte në një ndeshje “Play-Out” me Kastriotin. Plot 11 vite më parë, ndërsa ditët e fundit është fotografi i njohur, Ferdinand Hazizllari që ka hapur arkivat duke treguar pamjet nga ajo ndeshje dramatike.
Fillimisht ishin krutanët që shënuan në minutën e 43-të të takimit duke shkuar në dhomat e zhveshjes në avantazh të 1 goli. Ndërsa në të dytën, të kuqtë morën në dorë “frerët” e lojës. Duhej të vinte minuta e 75-të që Partizani të barazonte shifrat me Rezart Maho. Futbollisti i kuq çon topin në rrjetë, por në mënyrë të dyshimtë anësori Arjan Mali e anulon për pozicion jashtë loje. Protestat ishin të shumta nga ana e skuadrës së Partizanit dhe nga tifozëria e kuqe. Pikërisht protagonisti i kësaj ndeshje, ish-sulmuesi korçar, Marius Ngjela ka folur për newsport.al duke treguar si e mban mend atë takim.
“Ishte një ndeshje mjaft e rëndësishme për ne. Duhej të bënim gjithçka që të mbanim Partizanin në Superligë. Vinim nga një sezon shumë i vështirë pasi kishim probleme financiare, por edhe organizative. Dhamë maksimumin tonë dhe arritëm të barazonim, rezultat që na mbante në lojë për të qëndruar në Superligë”, thotë fillimisht ai.
Arjan Mali vijon të jetë edhe sot e kësaj dite temë diskutimi në ambientin e kuq. Ngjela s’do ta harrojë kurrë atë moment, kur pa flamurin e ngritur: “Nuk e di. Në atë moment s’mendova asgjë. Vetëm instiktivisht vrapova drejt Malit. S’mund ta besoja sepse ne e kishim bërë atë gol me mur”, shton më tej ish-sulmuesi i kuq.
Arrin të shpjegojë me detaje momentin e golit, se si e kishte planifikuar me shokët e skuadrës: “Bëra mur me Begën dhe më pas krosova. Rezi ishte shumë pranë portës dhe arriti të shënonte. Por, për Malin ishte offside. Në asnjë vend të botës s’ka pozicion jashtë loje nga muri. Shkova direkt aty me Mahon dhe e kapa në grykë”, vijon të të tregojë korçari.
Vitet kanë kaluar, ndërsa ajo ndeshje është e freskët në mendjen e Ngjelës. A ka pasur ndonjë kontakt pas 29 majit të 2009-tës me arbitrin protagonist? “Jo, asnjëherë sepse gjasme e pezulluan”, përgjigjet me ironi 37-vjeçari.
Në atë ndeshje ka qenë arbitër kryesor, një nga më të mirët e kampionatit shqiptar, pikërisht Lorenc Jemini. Për ish-gjyqtarin e FIFA-s, Ngjela ka konsideratat më të larta dhe këtë e thotë hapur: “Ai ishte korrekt për gjatë gjithë takimit. Partizanin e rrëzoi nga kategoria ai flamur”.
Sot, Arjan Mali është anëtar i Komisionit të caktimit të arbitrave pranë Federatës Shqiptare të Futbollit. Dhe kur i thuhet ky fakt, Ngjela mbyll intervistën: “Zbatoi me përpikmëri urdhërat dhe normalisht u shpërblye. Partizanin s’e donin në Superligë. Kaq!”, përfundoi një nga ish-sulmuesit më të spikatur të Superligë. /Retin TOKA/
Egnatia, Vllaznia, Dinamo dhe Partizani deri më tani në “Final Four”. Mendoni se do të ketë ndryshime deri në fund të Superiores?
-
Po
-
Jo
-
Nuk e di
