U largua nga Skënderbeu në këtë merkato verore për t’u transferuar te skuadra e Gabalës në Azerbajxhan. Mesfushori i kombëtares shqiptare ende s’ka gjetur golin e parë në një ndeshje zyrtare, megjithatë ai shpreson se ky “ngërç” do të kalohet së shpejti.
Në një intervistë ekskluzive për newsport.al, ish-regjisori i mesfushës së Skënderbeut prek një sërë çështjesh: Nga kampionati azer, ngacmimet e Agollit e deri te pagat e padhëna të Skënderbeut. Në fund jep mendimin e tij edhe për kampionin e këtij sezoni futbollistik në elitën e vendit tonë.
– Lilaj, ju këtë sezon luani në një tjetër kampionat, ku padyshim që jemi pjesë e formacionit startues, por kemi ardhur thuajse në gjysmën e sezonit dhe ende nuk keni shënar golin e parë? Si e komentoni këtë situatë?
Prej 6 muajsh luaj në kampionatin azerbajxhanas dhe është e vërtetë që akoma s’kam arritur të shënoj. Mbase dhe për faj të pozicionit që luaj para mbrojtjes dhe merrem më shumë me nxjerrjen e topit para. Ndoshta edhe fati më ka penalizuar pak sepse kam goditur dy herë shtyllën. Meqë ma kujtove, shënova pardja në miqësore, kështu që shpresoj që në gjysmën tjetër të vijë edhe goli.
– Në kampionat skuadra juaj nuk është se ka bërë edhe aq mirë, pasi në 14 ndeshje të luajtura keni marrë vetëm 17 pikë. E prisnit këtë situatë, të paktën deri në këtë pjesë të sezonit?
Të them të drejtën nuk e prisja, por ka pasur shumë ndryshime në ekip. Trajneri është larguar, ka ardhur edhe trajneri i ri. Fazën e parë kemi pasur shumë probleme. Më pas, në fazën e dytë, ekipi nisi të ndryshojë dhe ne lojtarët, u njohëm më shumë me njëri-tjetrin. Shpresoj që në dy fazat e mbetura të vazhdojmë të bëjmë mirë.
– Ju luani në të njëjtin kampionat me Ansi Agollin, i cili aktivizohet me Karabak. Në përballjen direkte skuadra e tij ka fituar thellë 4-1. Si e keni përjetuar këtë sfidë përballë një lojtari tjetër shqiptar?
Karabaku është ekipi më i mirë i kampionatit. Ka vite që është kampion dhe nuk e diskuton titullin. Ka gati 30 lojtarë që janë gati për të luajtur. Kështu që është një diferencë e madhe në krahasim me skuadrat e tjera. Sa herë që vjen Agolli më ngacmon, shpresoj që ndeshjet e tjera të marr hak.
– Në Superiore keni kaluar pjesën më të madhe të karrierës. Po tani që jeni larg, i ndiqni ndeshjet e kampionatit shqiptar?
Të them të drejtën, nuk është se kam arritur të shoh ndeshje të kampionatit shqiptar. Vetëm kur erdha me pushime arrita të shoh pjesën e parë të sfidës mes Kamzës dhe Skënderbeut. Për fatin e keq, Skënderbeu humbiste 1-0 dhe të them të drejtën, s’ishte një ndeshje e bukur për t’u parë. Gjithsesi sa herë që më jepet mundësia, informohem për kampionatin shqiptar.
– Ju keni luajtur me dy nga skuadrat më me emër të Superiores. Cilën do të zgjidhje mes Tiranës dhe Skënderbeut?
Është e vështirë të zgjedhësh, pasi të dyja janë ekipe që më kanë dhënë shumë, por dhe iu kam dhënë shumë. Me të dyja ekipet kam fituar gjithçka në Shqipëri, kështu që do t’i zgjidhja të dyja. Siç e thashë kam fituar gjithçka.
– Mendoni se në paraqitjet e Skënderbut në 2 fazat e para të kampionatit të ketë ndikuar çështja “UEFA” dhe a mund ta fitojnë ata këtë betejë?
Mbase ka ndikuar edhe çështja UEFA, por s’besoj. Më shumë ka ndikuar ndërrimi i lojtarëve. Kanë ardhur shumë futbollistë të rinj. Trajneri është i ri, ndërkohë që skuadra ka më shumë nevojë për eksperiencë. Gjithsesi po bëjnë mirë, pavarësisht se në 4-5 javët e fundit, nuk kanë arritur rezultate, por deri në ato momente skuadra po bënte vërtetë mirë.
– Me Orges Shehin keni “korrur” shumë suksese kur keni qenë të dy në fushën e lojës. Por tani si trajner, çfarë mendimi keni për të?
Nuk e di çfarë të them për Shehin si trajner, pasi duhet të punosh me të që të japësh një mendim. Si lojtar mund të them gati gjithçka sepse kemi luajtur 6 vite bashkë. Si trajner, vërtetë nuk e di si ta komentoj. Shpresoj që t’i shkojë mbarë dhe Skënderbeu të ngjitet sa më lart.
– Nëse një ditë të thërrasin për t’u rikthyer në Korçë, cila do të ishte përgjigja juaj?
Sigurisht që po, Skënderbeu është familja ime, është shtëpia ime, është qyteti ku kam lindur. Me kënaqësinë më të madhe do të rikthehesha sërish. Dhe shpresoj të rikthehem.
– Ju u larguat nga Skënderbeu me një mosmarrëveshje për pagesat e pashlyera. A mund të na tregoni se çfarë ka ndodhur?
Është e vërtetë, megjithatë tashmë kemi arritur një marrëveshje dypalëshe për këtë çështje.
– Po për debatin në distancë mes Takajt dhe Osmanit, ç’opinion ke?
Nuk kam një koment për këtë, është problem i tyre.
– Cila skuadër mendoni se e fiton Superioren në fund të sezonit?
Partizani po bën mirë dhe sa kam parë përmes portaleve ka bërë disa afrime cilësore. Durrësi është po aty afër, edhe shpresoj që Skënderbeu të qëndrojë atje deri në fund dhe të luftojë për titull. Dëshira ime është që ta fitojë Skënderbeu, por që… Le të shpresojmë. /Nazif Zylali/
Loading ...
