Drejtori i përgjithshëm i Skënderbeut, Haris Fakiç, ka folur për blerjen më të fundit të tyre në merkaton verore, pikërisht për Enis Gavazajn. Gjithashtu ai ka sqaruar si qëndron politika e klubit bardhekuq në lidhje me afrimin e futbollistëve të rinj në skuadrën korçare.
“Enis Gavazaj është blerja e radhës për ne, por jo e fundit. Bëhet fjalë për një lojtar me shumë cilësi. Një futbollist me një përvojë 2-vjeçare në kampionatin belg, ku ka luajtur edhe për ekipin e kategorisë së parë, Gent. Pas një marrëveshje mes dy klubeve, Enis Gavazaj do të jetë pjesë e Skënderbeut për tre vitet e ardhshme. Ai bën pjesë dhe te të rinjtë e Kombëtares U-21 të Shqipërisë. Mua më gëzon fakti që Skënderbeu ka nën objektivën e tij futbollistë të rinj, dhe kjo do të jetë politika e klubit tonë. Ne po punojmë për të ardhmen e skuadrës tonë, por në të njëjtën kohë pretendojmë të fitojmë përsëri titullin kampion dhe në Europë të thyejmë historinë e klubit tonë, të kalojmë përtej grupeve. Kjo nuk është aspak e lehtë, por stafi ynë, lojtarët tanë e dinë çfarë duan dhe besoj që gjithë futbollistët që janë bërë pjesë e organikës tonë, i dinë shumë mirë pretendimet tona. Përgjegjësia është e madhe, po ashtu edhe dashuria për këtë fanellë”, ka deklaruar drejtori i përgjithshëm i skuadrës së Skënderbeut.
I pyetur për aludimet më të fundit për një kalim të mundshëm të lojtarit që luan për ngjyrat e Shkëndijës së Tetovës, Ferhan Hasanit te skuadra korçare, 34-vjeçari ka mohuar gjithçka.
“Ferhan Hasani është një lojtar shumë i mirë. Ne si klub, nuk kemi pasur asnjë kontakt me të deri në këtë moment. Gjithçka që thuhet, janë thjesht spekulime. Asgjë nuk është e vërtetë për lojtarin e Shkëndisë së Tetovës“, ka përfunduar drejtori i klubit të korçarëve.
