Baton Zabërgja mund të themi që ishte “kryefjala” e javës së 7-të të Superiores. Lojtari i Dinamos u përfshi në një episod shumë të dyshimtë në ndeshjen që dinamovitët luajtën përballë Vllaznisë në “Elbasan Arena” dhe që përfundoi në barazim 1-1. Në minutën e 88-të në zonën e Vllaznisë u krye një ndërhyrje pikërisht ndaj Zabërgjës, me këtë të fundit që pretendoi për penallti, por përfundoi duke marrë kartonin e dytë të verdhë për simulim dhe duke lënë ekipin e tij me 10 lojtarë.
Në një intervistë ekskluzive për “Newsport.al”, 22-vjeçari flet për atë episod në ndeshjen përballë shkodranëve duke u shprehur se ishte penallti. Më tej ish-lojtari i Gjilanit flet për objektivat e tij personale, objektivat e Dinamos. Ai gjithashtu shprehet mbi një ftesë që mund të vijë në një të ardhme të afërt apo të largët nga Kombëtarja shqiptare.
-Pyetja e parë meqë ishte një episod që krijoj shumë polemika. Kartoni i dytë i verdhë për ju në momentin e rrëzimit në zonë në ndeshjen përballë Vllaznisë?
“Isha protagonist tek ai rast dhe unë mendoj se ishte penallti, pasi kishte kontakt. Mirëpo, arbitri vendosi ndryshe dhe tani duhet të shohim përpara.”
-Dinamo la 2 pikë apo mori 1 pikë në ndeshjen përballë Vllaznisë?
“Mendoj se në këtë ndeshje meritonim të fitonim. Ishim më kërkues, kishim edhe rastet tona, por nuk i konkretizuam dot dhe në fund dolëm me një pikë. Duke parë rrjedhën e lojës, mendoj se Dinamo humbi dy pikë, sepse e merituam.”
-Objektivat që Dinamo ka këtë sezon?
“Ekipi synon qe te ngjitet sa më lart në renditje,pse jo edhe në top 4.”
-Objektivat që Zabërgja ka këtë sezon?
“Objektivat personale janë që të paraqitem sa më mirë dhe ta ndihmoj klubin.”
-A mendon se këtë sezon arbitrat janë treguar pakëz ‘të ashpër’ me Dinamon?
“Dinamo është një prej ekipeve më fair play dhe mendoj se arbitrat në ndonjë rast edhe mund të ishin kursyer.”
-Në Kupë do të përballeni me Ilirinë, a është Kupa e Shqipërisë që Dinamo ka si objektiv?
“Patjeter, kupa është objektiv të shkojmë sa më larg.”
-Ju u larguat nga Liga e Kosovës dhe erdhët në Shqipëri. E shihni Superioren si një mënyrë më të lehtë për të shkuar jashtë?
“Pas 4viteve në Superligen e Kosovës mendova ta bëj këtë hap që besoj se do të më ndihmoj shumë në karrierën time personale për të ardhmen.”
-Nëse do të vinte një ftesë nga Kombëtarja shqiptare do e mirëprisnit?
“Ftesën do e mirëprisja me shumë knaqsi,do ishte një ëndërr e bërë realitet, jo vetëm për mua por edhe për familjen time.”
