Sergej Milinkoviç-Saviç do të kryejë ditën e sotme vizitat mjekësore në Milano. Lajmi është konfirmuar nga mediat italiane, sipas të cilave rreth mesditës pritet të ndodh dhe firmosja e kontratës, ndërkohë që limiti kohor për finalizimin e marrëveshjes me Milanin do të jetë ora 18:00 kur mbyllet dhe merkatoja në Itali.
Në këtë mënyrë kuqezinjtë ia kanë dalë mesa duket të afrojnë në skuadër një ndër lojtarët më të kërkuar të momentit, duke mposhtur konkurrencën e shumë klubeve të mëdha Europiane. Sipas të gjitha gjasave serbi i Lazio-s do të vij në “San Siro” në formë huazimi për 40 milionë euro, me Milan që do të ketë opsionin e blerjes së tij vitin e ardhshëm për rreth 70 milionë euro të tjera.
Në këtë mënyrë Saviç pritet të bëhet ndër blerjet më të shtrenjta jo vetëm për Milan por edhe për kampionatin italian në tërësi në këto vite të fundit.