
Në Argjentinë të gjithë janë në festë. Lionel Messi më në fund ia doli të ngrinte në qiellin e Katarit trofeun e shumë munguar, duke i dhuruar kështu Argjentinës edhe yllin e tretë në fanellë. Pikërisht para kësaj fitorje shumë tifozë apo njerëz të sportit kanë bërë premtime të ‘çmendura” në rast se Argjentina do të fitonte Kupën e Botës.
Vetëm 2 ditë pas kësaj fitoreje historike, tashmë është kohë për të mbajtur premtimet dhe Dario Benedetto do e mbajë fjalën e dhënë. Sulmuesi i Boca Juniors, një idhull në “Bombonera”, ka veshur pesë herë fanellën e kombëtares albiceleste.
Përpara fillimit të Botërorit Katar 2022, 32-vjeçari deklaroi se do bënte tatuazh Leo Messin nëse kupa rikthehej në Buenos Aires. “Po bëj një tatuazh të Leo Messit. E premtova dhe do e mbaj fjalën.Dua ta falënderoj gjithmonë Leon për fitimin e Kupës së Botës me Argjentinën”, u shpreh sulmuesi, i cili luajti vetëm pesë herë përkrah idhullit të tij në Kombëtare.