Nuk është vetëm Tirana ajo që duhet të vrasë mendjen për takimin e radhës dhe pas saj. Edhe te Kukësi presioni sa vjen dhe po rritet. Verilindorët nuk e kanë gjetur fitoren në dy ndeshjet e para të sezonit të ri me Laçin dhe Flamurtarin. Nisja e edicionit të ri e ka vënë në vështirësi skuadrën dhe teknikun Armando Cungu, i cili duhet të rikthejë në drejtimin e duhur ekipin pa humbur më tepër kohë. Përballë bardhebluvë Cungu duhet t’ia dalë mbanë pa 3 lojtarët kryesorë: Donjet Shkodrën, Valon Ethemi dhe Simon Rrumbullakun. I pari është dënuar nga klubi për kundërshtimin e uljes së rrogës, ndërsa Ethemi dhe Rrumbullaku janë të dëmtuar. Megjithatë tekniku shkodran ka gati alternativat zëvendësuese Vesal Limajn, Dino Spehar dhe Vangjel Zguron.
Kukësi-Tirana do të jetë dhe supersfida e kësaj jave.