Shqipëria është në karantinë dhe qysh prej 12 marsit 2020 topi i futbollit dhe gjithë aktivitetet e tjera sportive janë ndalur. Në këto kushte, me afatin e pacaktuar se kur do të rinisë aktivieti normal, klubet janë të detyruara të paguajnë lojtarët e tyre sipas kontratave. Edhe pse në një situatë të paprecedentë, futbolli shqiptar ka nevojë që organizatorët t’i dalin për zot.
Nëse jo shteti, atëherë Federata Shqiptare e Futbollt duhet të mbështesë me aq sa mundet klubet, duke iu dhuruar të paktën pjesën e rrogave. Në situatën e Covid-19, mbarë ekonomia globale ka ndalur motorrët, ndërsa Shqipëria jonë e varfër nuk mund të bënte ndryshe. Me buxhete dhe financime modeste nëse i krahasojmë me rajonin, ekipet shqiptare vijojnë të mbeten në këmbë.
Shembulli që na vjen nga Kosova, aty ku Ministria e Sportit dha një fond prej 5 milion eurosh për sportin është tejet pozitiv. FSHF, Liga Profesioniste dhe Shoqata e Futbollistëve i kanë kërkuar zyrtarisht ndihmë shtetit sa i takon pagave për lojtarët dhe stafet, ndërsa ende nuk ka një përgjigje. Federata shqiptare e Futbollit do të duhet të japë vetë ndihmesën e para, me aq sa mundet.
Në këtë periudhë të ndaljes së gjithçkaje, ekipeve kombëtare shqiptare iu janë anulluar afro 8 ndeshje miqësore, që nëse i marrim të mirëqëna shpenzimet e fluturimeve, grumbullimeve apo akomodimeve, do të kapnin shifrën e afro 500 mijë eurove. Shumë kjo e “shpëtuar” për FSHF-në. A nuk do ishte e udhës që ky fond t’i vihej në dispozicion klubeve në këtë situatë kaq të vështirë? /Newsport.al/
Loading ...
