Dy ditë pas ndeshjes, kapiteni Lorik Cana ka pranuar gabimin, por jo në rastin e kartonit të kuq. Ja si u shpreh kapiteni:
“Në atë moment nuk e mendon fare humbjen e ndeshjes së radhës, por mendon a ia vlen t’i lësh të tjerët me një lojtar më pak dhe të mos rrezikoja të lija kundërshtarin ta merrte topin i vetëm. Me trajnerin dhe skuadrën, ‘mea culpa’ më e madhe ishte në lidhje me ndërhyrjen e gabuar të parë, kur u ndëshkova me të verdhë”.
Cana flet edhe për ngjarjet e ditëve të fundit, ku qyteti i Marsejës u kthye në një fushë betejë, që për të, tifozeria shqiptare nuk do të ketë asnjë lloj problemi: “Është një qytet mikpritës. Gjithmonë kur ka pasur ndeshje të mëdha, aty nuk ka pasur probleme të mëdha. Ndërsa ne kemi tifozë të mrekullueshëm, që jo vetëm vijnë në numër të konsiderueshëm të përfaqësojnë vendin e tyre dhe identitetin tonë, përfaqësojnë edhe veten e tyre. Ata e përfaqësojnë kulturën tonë në mënyrë të jashtëzakonshme”, deklaroi më tej kapiteni Cana.
32-vjeçari nga Prishtina mendon se përtej rezultateve, Shqipëria vetëm do të përfitojë nga ky Europian.
“Ekipi nuk ka asgjë për të humbur, por ka gjithçka për të fituar. U kam thënë edhe shokëve të mi përpara ndeshjes me Zvicrën, pavarësisht se çfarë do të ndodhë gjatë 3 ndeshjeve, me rëndësi është që të ruajmë mënyrën tonë të lojës dhe, mos harroni, deri në minutë të fundit të ndeshjes së fundit mund të jemi në garë për kualifikimin. Këtë duhet të mos e heqim nga mendja”, përfundoi Cana intervistën e tij.
