Katër skuadra dhe një “mision” i vetëm, kualifikimi në finalen e madhe drejt Gjermanisë. Në Conference League do të luhen mbrëmjen e sotme ndeshjet e kthimit të gjysmëfinaleve, të cilat pritet të nisin në orën 21:00.
Rayo Vallecano, skuadër në të cilën aktivizohet dhe mbrojtësi i Kombëtares shqiptare, Ivan Balliu luan në transfertë përballë francezëve të Strasbourg. Pasi fituan në aktin e parë minimalisht 1-0, spanjollët kërkojnë të vazhdojnë atë çfarë nisën në shtëpinë e tyre, edhe pse takimi vijon të mbetet i hapur për çdo skenar të mundshëm.
Sakaq, anglezët e Crystal Palace do të kërkojnë të mbrojnë rezultatin e ndeshjes së parë të fituar me rezultatin 3-1 ndaj ukrainasve të Shakhtar Donetsk. Faktori fushë pritet të jetë një shtysë e rëndësishme për vendasit të cilët presin dhe mbështetjen e tifozëve për të kryer me sukses “detyrat e shtëpisë”.
Finalja në Leipzig është e përcaktuar të luhet në stadiumin “Red Bull Arena”, më 27 maj në orën 21:00.
Lexo gjithashtu
