Alban Hoxha mbushi 36 vjeç. Portieri i Partizanit është më "i vjetri" i Superiores, në çdo statistikë përveç moshës. Ky shkrim shkon për të dhe 10 vitet te Partizani.
Alban Hoxha i bashkohet familjes së kuqe në verën e vitit 2013. Asokohe punohet për ndërtimin e një skuadre, që do përfaqësojë denjësisht emrin e madh. Partizani i kthehet elitës së futbollit shqiptar pas katër viteve mungesë. Katër si dyzetë, ku u prek fundi.
Garancia e një ekipi të ri që do hedhë bazat për të ardhmen e ndritur, nis nga porta. Për këtë afrohet Alban Hoxha. Numri 12, që shihet si zgjedhje e dytë te portierët, bëhet pronë e 25-vjeçarit dhe pse vetëm zgjedhje e dytë nuk është. Për pak kohë fiton besimin e të gjithëve.
Gjërat ecin vrullshëm vitin e ardhshëm. Hoxha bekohet për herë të parë me djalë, i cili do mbajë emrin Beko. Bekim e kishte i ati i Albanit. Momenti më i vështirë i vitit 2014 është humbja e bashkëshortes, për shkak të komplikacioneve shëndetësore pas lindjes së djalit.
Hoxha kthen dhimbjen në forcë dhe disa ditë më vonë thyen rekordin historik, që çdo portier dëshiron ta ketë. Historia e futbollit shqiptar e njeh atë prej 13 dhjetorit të vitit 2014, si portieri rekordmen që ka mbajtur 1084 minuta rrjetën e paprekur. Arritje që erdhi 30 vite pasi Bujar Gogunja i Elbasanit u thye te minuta 1037 pa pësuar. Atë dhjetor shpallet "Futbollisti i Vitit", çmim gjithashtu i rrallë për një portier në vendin tonë.
Alban Hoxha ia del që me paraqitjet te Partizani, të bëhet pjesë e skuadrës historike që përfaqësoi Shqipërinë në Europianin 2016. Tjetër sukses që nuk harrohet atë vit, është ai përballë Ferencvaros në Hungari. Turi i dytë kualifikues i Champions League dhe kthehet në heroin e të kuqve gjatë penalltive. Shënon fillimisht një të tillë me panenka dhe pret 3 të tjera.
Në vitin 2019 është cërrikasi që i drejton qiellit trofeun kampion, pas 26 viteve pritje. Ka pasur dhe ditë të këqija në karrierën e tij, po të mirat janë ndër më të bukurat që mund të ketë një futbollist në Shqipëri.
I vetmi që luan prej dekadës së shkuar me Partizanin dhe bashkë me Emiljano Vilën janë të vetmit mbi 30 vjeç. Dhjetra lojtarë të tjerë janë pritur dhe përcjellë çdo sezon prej tij. Cërrikasi është markë dhe shembull për dorezat e kuqe.
Alban Hoxha nuk është aktualisht vetëm emblemë e Partizanit, por dhe e Superiores. Asnjë nuk numëron mbi 30 mijë minuta si ai. Po ashtu është i vetmi me mbi 350 ndeshje. E vetmja gjë që i mungon është goli dhe pse me penalltitë e pritura mund të thuhet se ka "shënuar".
Hoxha është përfolur dhe per oferta jashtë Shqipërisë. Po ashtu rivalët e kryeqytetit tentuan disa herë ta afronin në skuadër. Dhe pse shifrat ishin më tunduese se të Partizanit, në fund Hoxha zgjodhi fanellën. Ai pranoi dhe stolin apo të dorëzonte shiritin e kapitenit, ndërsa tani gëzon respektin e tifozëve.
Albani shihet jo vetëm si një lojtar për skuadrën, pasi të tillë Partizani ka shumë. Ai është kapiteni. Partizani është me fat që mban në skuadër futbollistin më me eksperiencë të Superiores. 10 vite kaluan. Si "I fundit i Mohikanëve", është i fundit që vazhdon rrugëtimin nga Partizani i parë që iu rikthye elitës.
E. L
Lexo gjithashtu
