Erando Karabeci ka folur në prag të sfidës kundër Partizanit. Në konferencën e sotme për shtyp, kapiteni i Tiranës ka pranuar se të kuqtë janë euforikë në prag të derbit dhe se bardheblutë më shumë se rivalët kanë titujt kampionë dhe fanellë më të rëndë.
"Jemi përballë një ndeshjeje të rëndësishme. Kundër Partizanit është një ndeshje speciale, e cila duhet fituar me çdo kusht. Nëse fitojmë sigurisht që do të kemi një vazhdimësi edhe më të mirë në ndeshjet e radhës. Momenti që Tirana të fitojë në derbi ka ardhur me kohë. Në derbi jo gjithnjë fiton më i miri. Këto ndeshje i vendosin episodet dhe fati.
Ne na ka munguar fati në sfidat e fundit kundër Partizanit. Duhet të përqendrohemi maksimalisht dhe të kemi edhe pak fat, element ky që na ka munguar në sfidat e fundit derbi. Shpresoj që gjykimi të jetë i denjë për këtë sfidë. Ne si futbollistë nuk na takon të flasim për gjykimin, por të gjithë e keni parë së çfarë i ka ndodhur Tiranës në këto javë të para të kampionatit nga gjykimet e arbitrave.
Nëse luajmë aq të përqendruar si ndaj Kukësit, mendoj se këtë herë ndaj Partizanit do të fitojmë. Kjo lloj ndeshjeje nuk luhet, por luftohet për të dalë triumfues. Shpresoj shumë që të zgjidhim njëherë e mirë problemin me sulmin që në takimin kundër Partizanit.
Tirana feston për barazime? Jo, asnjëherë nuk ka ndodhur! Nëse rivalët e kanë fjalën për festën në derbin e fundit pas barazimit 2-2, thjesht për ta sqaruar dua të them së përshëndetëm tifozët pas ndeshjes edhe për faktin se i prishem punë Partizanit në luftën për titull. Partizani është ai që feston për barazimet.
Tirana më shumë se të kuqtë ka titujt kampionë dhe fanella i peshon më shumë se ajo e Partizanit", deklaroi kapiteni i Tiranës në konferencën e sotme për shtyp.
Lexo gjithashtu
