Vokli Laroshi është lojtari më i ri i skuadrës së Llapit. Portieri i njohur shqiptar ka gjetur marrëveshjen me klubin kosovar ku do të japë kontributin e tij për pjesën tjetër të sezonit.
Lajmi është bërë me dije nga Llapi që përmes një njoftimi në kanalin zyrtar, zbulon arritjen e marrëveshjes. Ish-portieri i Partizanit ka firmosur një kontratë që e lidh me bardheblutë për 2 vite e gjysmë. Në lajmërimin e bërë në faqen zyrtare të klubit thuhej:
“Gardiani” 21-vjeçar nënshkruan për dy-vite e gjysmë me Llapin
KF Llapi ka arritur marrëveshje me portierin shtatlartë Vokli Laroshi, i cili është bashkuar ditën e sotme me ekipin në Antalya.
Laroshi, i lindur në Elbasan, ish-reprezentues i Shqipërisë U21 e rrit edhe më shumë cilësinë e ekipit.
Ka qenë pjesë e Shkëndijës së Durrësit U19 për t'u transferuar më pas tek Partizani i Tiranës dhe së fundmi për një-vit ka qenë pjesë e Turbinës, si kapiten i ekipit.
Laroshi vjen në ekipin tonë pas insistimit të kryetrajnerit Batatina dhe pas bashkëpunimit me klubin e Turbinës të cilët i falenderojmë për korrektësinë dhe profesionalizmin e treguar në transferimin e Laroshit në klubin tonë.
Numri 12 do jetë numri i ri për portierin Laroshi me fanelën dhe ngjyrat e KF Llapit.
Lexo gjithashtu
