Ndeshja e basketbollit ndërmjet Vllaznisë dhe Tiranës, e luajtur dje në Shkodër përfundoi me rezultatin 66-84 në favor të bardhebluve.
Në këtë takim pati edhe acarim të situatës mes basketbollistëve të të dyja kampeve duke sjellë përplasje fizike mes tyre, ndërsa situata u bë kaotike. Dy lojtarë të Tiranës dhe dy të Vllaznisë u nxorën nga loja nga arbitri i ndeshjes.
Por, një moment tjetër i rëndë ishte edhe çasti kur basketbollisti i Tiranës, Erkand Karaj, goditi me grusht trajnerin e Vllaznisë, Bledar Gjeçaj. Ky i fundit sqaron në një intervistë për newsport.al gjithë intensitetin e ngjarjes, ndërsa ka sqaruar se pse u ndodh mes dyndjes së lojtarëve gjatë momentit të sherrit.
"Ishte një situatë kaotike, ku lojtarët nisën të përplaseshin mes tyre papritur. Hyra mes grumbullit të basketbollistëve të mi për t'i larguar dhe për t'i ndarë, pasi detyra e trajnerëve në këto situata është pikërisht të shuajë konfliktet.
Ishte e pakuptimtë hyrja e lojtarëve rezervë të Tiranës në tapet, ndërsa njëri prej tyre më goditi edhe mua me grusht. Në fakt, unë e kam parë ditën e sotme me vëmendje se çfarë ka ndodhur përmes pamjeve filmike, sepse isha gjatë gjithë kohës i përqendruar te rezultati i ndeshjes, por edhe te situata, sepse nuk doja që të acarohej më shumë.
Nuk kam pasur kurrë konflikt me basketbollistin e Tiranës që më goditi me grusht, as para, as gjatë ndeshjes. Madje as nuk reagova kur më goditi. E lashë çdo gjë që ndodhi aty dhe nuk kam ndërmend të bëj as denoncim", shprehet për newsport.al, trajneri i ekipit të basketbollit të Vllaznisë, Bledar Gjeçaj.
Ndërkohë që gjatë prononcimit të tij, trajneri i Vllaznisë pranon se për fat të mirë, situata nuk u agravua edhe më shumë.
"Siç erdhën ngjarjet dje në pallatin e sportit 'Qazim Dervishi', mund të ishin përsëritur të njëjtat skena si në sfidën e futbollit Vllaznia-Tirana në 'Loro Boriçi' më 11 shtator 2014.
Por për fat të mirë nuk ndodhi. I kishte të gjitha premisat që të ndodhte sërish rrëmujë duke parë se në pallat sporti kishte edhe ultras dhe gjendja mund të ishte përkeqësuar edhe më shumë. Gjithsesi, për fat të mirë, e përsëris, për fat të mirë nuk ndodhi", përfundon trajneri i skuadrës së basketbollit të Vllaznisë për meshkuj, Bledar Gjecaj./ Newsport.al
Lexo gjithashtu
