Flamurtari dhe Vora barazuan ditën e sotme në kuadër të javës së 13-të të Superiores. Sfida e zhvilluar në stadiumin e Vlorës, përfundoi me shifrat 1-1. Pas këtij dueli ka folur trajneri i Vorës, Arjan Bellai.
“Unë dua të përgëzoj çunat për shpirtin dhe cilësinë që treguan në pjesën e parë. Kemi futbollsitë me cilësi, për të luajtur, për presing. U kthyem prap te ajo Vora që unë dua, te mbajtja e topit, te build-up. 1 pikë me Flamurtarin, në këtë fushë dhe stadium të përkryer, është mirë.
Vora për mesin e artë? Nuk lidhem fare me mungesat. Kush është dëmtuar, është zëvendësuar, e ka bërë punën njësoj, s’do të mbetemi te dëmtimet. Me të gjitha këto ekipe që kemi luajtur, kemi treguar që mundemi. Dy ekipe që na mundën thjeshtë, ishin Dinamo dhe Egnatia që kanë cilësi. Me Vllazninë bëmë mirë.
S’e kishim përgatitur kështu ndeshjen me topa të gjatë. Por kur pamë fushën që mund të gabonim me topa të kthyer te portieri ose majtas e djathtas, dhamë urdhër tjetër, që kur të jenë në presion, të kalonim topin para. Ato topa që mbajtëm, s’i bëmë mirë, ekipi ishte shumë i zgjatur.
Bardhi? Është futbollist që ka luajtur të gjitha ndeshjet. E dimë kush është ngarkuar më shumë e më pak. Prandaj i bëjmë këto ndërrimet. Ata që janë më të ngarkuar t’i çlodhim. Ata që s’kanë mundur, të vazhdojnë.
Duke bërë analizën e Flamurtarit që të martën, gjatë gjithë javës punuam që Bardhi dhe Dakën t’i kishim midis linjave. I kemi punuar, e dinim ku Flamurtari kishte difekte. Atë që bëmë më mirë ishte mbulimi i Trashit me Xhuljon. Vetëm në pjesën e dytë bëri 2-3 krosime, por Xhuljo ia doli.
Shifrat e sulmuesve, 1 gol nga 3 të tillë (9-sha)? Jam i kënaqur pasi ata s’janë vetëm për të shënuar. Të gjithë futbollistët janë për të shënuar. Në momentin që ndihmojnë në mbrojtje, duke mos lënë çunat të lodhen, për mua është më e mirë, pasi si Bardhin, Kasallën, Karricën, kur i kishim, ishin më të lirë dhe të çlodhur. Duhet punuar për shënimin, kemi difekte, s'jemi perfektë”, tha Bellai.
Lexo gjithashtu
