Aleksandar Veselinovic ishte një nga surprizat e Partizanit në këtë merkato vere. Trajneri serb u prezantua tek të kuqtë menjëherë pas Kupave të Europës duke habitur jo pak opinionin sportiv në vend. Ai nisi punën me nënkampionët e Shqipërisë, megjithatë ndeshja derbi kundër Tiranës që u mbyll 0-0 tregoi se performance e kryeqytetasve lë për të dëshiruar.
Të shumta kanë qenë reagimet për emërimin e Veselinoviç në krye të Partizanit, me tifozët që janë ndarë në dy kahe. Ka nga ata që besojnë se skuadra do të bëhet kompetitive dhe e fortë me kalimin e kohës, pra e thënë ndryshe kërkohet t’i jepet kohë trajnerit. Nga ana tjetër skeptikët kritikojnë me forcë atë që ndodh në kampin e kuq duke mos besuar në aftësitë e tij. Pyetja që bëhet më së tepërmi është: Kush e solli?
E ndoshta këtë përgjigje e dha drejtori i përgjithshëm Olsi Rama që në panelin e emisionit “Rubrika Sportive” theksoi faktin se emërimi i trajnerit është e drejtë ekskluzive e drejtorit sportive Arbër Abilaliaj me presidentin Gaz Demi, që tanimë është shumë më aktiv duke qëndruar shumë pranë skuadrës.
Pritet me interes të shihet se cila do të jetë paraqitja e të kuqve në ditët në vazhdim, ku pritshmëritë janë të mëdha, por deri më tani fusha ka treguar se niveli i ekipeve të Superiores është thuajse i barabartë.
Lexo gjithashtu
