Arbitri i njohur botëror, Szymon Marciniak, dy asistentët Bartosz Heinig dhe Marek Arys, si edhe gjyqtari i VAR-it Paweł Malec, kanë mbërritur në Tiranë, ku mbrëmjen e sotme do të vendosin drejtësi në finalen e madhe për titullin kampion të “Abissnet Superiore”, mes Vllaznisë dhe Egnatias.
Marciniak dhe grupi i arbitrave u pritën nga Shefi i Departamentit të Arbitrimit në FSHF, Sokol Jareci, dhe përfaqësues të BASHF-së. Paraditen e sotme ata vizituan ambientet e “Shtëpisë së Futbollit”, ku u njohën më nga afër me investimet dhe zhvillimet e fundit në infrastrukturën e futbollit shqiptar.
Gjatë vizitës, ata panë nga afër fushat stërvitore, qendrën e trajnimit të Kombëtares, ambientet e brendshme të administratës, muzeun e FSHF-së, ku patën mundësi të njihen me historinë e futbollit shqiptar si dhe ambientet e qendrës së përhershme për sistemin VAR, ku po punohet për ta bërë funksionale nga sezoni i ri.
Marciniak dhe arbitrat u takua gjithashtu me zv.Presidentin e FSHF-së, Lutfi Nuri, Sekretarin e Përgjithshëm të FSHF-së, Ilir Shulku, Drejtorin Administrativ të FSHF-së, Aldi Topçiu dhe trajnerin e Kombëtares shqiptare, Silvinjo.
Në një prononcim të shkurtër për fshf.org, arbitri polak shprehu vlerësimet më të larta për “Shtëpinë e Futbollit” dhe bëri një thirrje për të gjithë të rinjtë shqiptarë t’i bashkohen arbitrimit përmes fushatës “Bëhu Arbitër”.
“Jam vërtet shumë i impresionuar. Kjo është ëndrra jonë në Poloni, të kemi një federatë si kjo. Para së gjithash, është shumë e vështirë të gjesh një vend në qendër të qytetit, siç keni bërë ju. Por ju i keni të gjitha, fusha stërvitjeje për lojtarët, muze, një histori të pasur dhe një të ardhme të ndritur.
Jam edhe më i impresionuar me Qendrën VAR që keni krijuar, që është edhe pjesë e planeve tona dhe shpresojmë ta përfundojmë vitin e ardhshëm.
Nuk më mbetet veçse t’ju përgëzoj dhe t’ju uroj gjithë të mirat për të ardhmen. Sepse, siç e dimë, një federatë e bukur dhe një qendër moderne janë të rëndësishme, por gjithmonë kemi nevojë për një sukses të madh për t’i bërë të gjithë të lumtur.
Kjo është një sfidë në mbarë botën, kemi gjithnjë e më shumë nevojë për arbitra të rinj. Prandaj, ky është një mesazh për ju, djem dhe vajza të reja: lini mënjanë kompjuterët dhe telefonat. Merrni një top, filloni të luani dhe pastaj bëhuni arbitra!
Mund të bëheni pjesë e ngjarjeve më të mëdha të futbollit në botë. Unë vetë jam një shembull i mirë, kam qenë pjesë e Kupës së Botës, Champions League, finales së Kupës së Botës për Klube dhe kam pasur mundësinë të shoh nga afër lojtarët më të mëdhenj si Messi, Ronaldo dhe të tjerë. Dhe më besoni, nuk pagova bileta dhe kisha vendin më të mirë në stadium! Mund të udhëtoni nëpër botë, të bëni atë që doni dhe të jeni pjesë e futbollit.
Edhe ju keni shembuj të mirë në Shqipëri, arbitra dhe instruktorë të mirë. Gjithçka është gati, mos u bëni dembelë. Ejani dhe dhe provoni të bëheni arbitra! “BËHU ARBITËR” – tha Szymon Marciniak në prononcimin për fshf.org
Finalja e kampionatit “Abissnet Superiore”, Vllaznia – Egnatia, do të zhvillohet sot në orën 20:00, në “Arenën Kombëtare”. Pritet një atmosferë entuziaste nga tifozët e të dyja ekipeve. Biletat vijojnë të jenë në shitje online në ebileta.al dhe fizikisht në biletarinë pranë stadiumit “Arena Kombëtare”.
Lexo gjithashtu
