Gjyqtari i katërt Marco Serra pritet të ndëshkohet rëndë pas përplasjes së tij me Jose Mourinho. Në sfidën e së martës Cremonese-Roma e përfunduar 2-1 për vendasit, Serra dhe Mourinho patën një debat mes tyre. Nga ky debat trajneri i verdhekuqve u ndëshkua me të kuqe nga gjyqtari kryesor. Mourinho e kontestoi dënimin duke pretenduar se gjyqtari i katërt u soll padenjësisht ndaj tij duke e provokuar.
Gjatë ndeshjes tekniku portugez kontestoi një vendim të kryesorit te gjyqtari i katërt. Ky i fundit ju kthye rëndë Mourinho duke e ofenduar. Nga ky ofendim trajneri i Romës u irritua çka solli kartonin e kuq për të. Siç raporton “La Repubblica”, shoqata italiane e arbitrave është e shqetësuar për sjelljen e Serra-s gjatë ndeshjes Cremonese-Roma.
40 vjeçari nga Torino me shumë mundësi do të dënohet me shumë muaj larg arbitrimit dhe ndoshta mund të dërgohet në liga më inferiore. Nga ana tjetër edhe Roma do ta apelojë vendimin për dënimin e Mourinho, për heqjen e kartonit të kuq.
