Kukësi arriti të fitonte sot në çerekfinale të Kupës së Shqipërisë me rezultatin 2-1 kundër Teutës. Por, kjo nuk mjaftoi që verilindorët të shkonin më tej pasi ishin mposhtur 2-0 në ndeshjen e parë.
Pas takimit ka folur trajneri Rraman Hallaçi, i cili tregoi atë që kishte ndodhur në “Kukës Arena”. në fjalën e tij për Oversport, tekniku i kuksianëve deklaroi:
“Më vjen keq për eleminimin. I kishim mundësitë. Këtë rezultat e ka marrë historia dhe duhet të shohim përpara. Skuadra ishte e ngarkuar në fillim prej tifozëve. Ekipi u afrua te porta kundërshtare. E mbajtën topin. Pjesa e dytë ishte më e mirë se e para. U munduam të bëjmë lëvizjet tona për të ndihmuar ekipin. Rrezikuam bindshëm kundërshtarin. Na vjen keq se mund të kishim shfrytëzuar më mirë rastin e fundit.
Pretendimi për penallti? Është shumë e thjeshtë. Topi është pas shpinës së mbrojtësit. Mbrojtësi i Teutës nuk sheh për topin. I ka vënë dorën te mesi dhe nuk e lë sulmuesin tonë te topi. Kjo lloj kapje quhet mundje. Ishte shumë e pastër si penallti. Nuk do të gabonte po të jepej penallti.
Kundërsulmin? Kishim folur në analizë që të jemi të kujdesshëm në kundërsulm. Sulmuesit dhe mesfushorët do të bëjnë tyren. I kisha thënë që të ishin të kujdesshëm. Po të ishin më të kujdesshëm në atë moment. Me kualitetet që kemi isha i sigurtë që do të dominonim në lojë. Skuadra kishte forcë dhe u ngrit. Të shohim ndeshjet e tjera sepse kemi sfida të rëndësishme në kampionat.
Në ndeshje të tilla duhet të jemi të kujdesshëm. Episodet vendosin fatin e ndeshjes. Duhet të ishim të kujdesshëm prej ndeshjes së parë që kishte fituar Teuta. Skuadra e ka kuptuar atë që i fola pas ndeshjes. I thashë që keni bërë gjithçka, ama nuk mjaftoi. Krijoi një volum loje. Jam i kënaqur me mbrojtjen dhe fazën sulmuese. Lojtarët anësorë po e ndihmojnë shumë skuadrën. Jemi të mërzitur, por do të gjejmë forcën për kampionatin”, tha ai.
Lexo gjithashtu
