Anis Mehmeti nuk është më futbollist i Bristol City. 25-vjeçari siç dihet është zyrtarizuar te Ipswich po në Championship, duke nisur kështu një aventurë të re në karrierën e tij futbollistike.
Sulmuesi largohet nga skuadra angleze pas 3 vitesh të shkëlqyera me Bristol, ku arriti të shënonte dhe të linte gjurmë. Falë paraqitjeve të tij pozitive, shqiptari zgjoi interesin e shumë klubeve, teksa nëpërmjet një letre të gjatë dhe të ndjerë , shpreh falenderimet për ish-klubin e tij, ndërsa mbyll kështu një kapitull në jetën e tij.
“Sot i them lamtumirë Bristol City, një klubi që ka qenë një pjesë shumë e madhe e jetës sime dhe e zhvillimit tim si futbollist. Që nga dita e parë që mbërrita këtu, ndjeva se rritesha çdo vit, jo vetëm si lojtar, por edhe si njeri. Koha ime këtu më ka formuar jashtëzakonisht shumë.
Dua të falënderoj çdo shok skuadre me të cilin kam luajtur ndër vite. Kujtimet në dhomat e zhveshjes, momentet e vështira, fitoret speciale dhe pengesat që i kaluam së bashku. Jam mirënjohës për çdo moment të vetëm të ndarë, brenda dhe jashtë fushës, me secilin prej jush.
Një falënderim i veçantë për trajnerin, Gerhard Struber. Në një periudhë të shkurtër kohe, ai tregoi besim të vërtetë tek unë në fushë, më besoi dhe më ndihmoi shumë me idetë dhe vetëbesimin e tij. Ai besim bëri një ndryshim të madh dhe e vlerësoj sinqerisht.
Gjithashtu dua t’i jap shumë merita Brian Tinnion dhe bordit drejtues. Ka pasur momente kur gjërat nuk kanë qenë gjithmonë të lehta, por ata qëndruan pranë meje, më mbështetën dhe më ndihmuan të vendosem në një pozicion për të pasur sukses. Besimi dhe mbështetja e tyre luajtën një rol të madh për ta bërë kohën time në këtë klub të suksesshme, përfshirë arritjen e “play-off”-it pas kaq shumë vitesh, diçka për të cilën do të jem gjithmonë krenar që kam qenë pjesë.
Për të gjithë stafin në prapaskenë, faleminderit që keni qenë gjithmonë fantastikë me mua, ditë pas dite. Puna që bëni pas skenave nuk kalon kurrë pa u vënë re.
Dhe së fundi, për tifozët: faleminderit për mbështetjen dhe dashurinë e jashtëzakonshme që më keni treguar ndër vite. Në momentet e mira dhe ato të vështira, ju ishit gjithmonë aty, në shtëpi dhe jashtë saj. E ndjeva atë mbështetje sa herë që vesha fanellën, dhe do të thotë më shumë për mua sesa mund ta shprehin fjalët.
Me dashuri,
AMII ❤️”, ka shkruar sulmuesi kuqezi. Kujtojmë se këtë sezon Mehmeti luajti në 31 ndeshje me Bristol në të gjitha garat ku kanë marrë pjesë, teksa ia doli të shënonte 9 gola dhe dhuroi 6 asiste.
View this post on Instagram
Lexo gjithashtu
