Etrit Berisha mund të largohet nga kampionati italian. Diçka të tillë e ka pranuar vetë portieri i Kombëtares shqiptare në një intervistë të dhënë për median suedese “Fotbollskanalen”. Berisha thotë se mund të rikthehet në Suedi te Kalmar pasi ende mban kontakte me ta, pasi kontrata e tij me Empolin përfundon këtë verë.
“Unë do të vendos pas Europiani. Kam një bebe të vogël në Stokholm dhe gruaja ime udhëton vajtje-ardhje mes Italisë dhe Suedisë. Ta shohim”, tha fillimisht Berisha.
Më tej, gardiani i Kombëtares shqiptare shtoi se ai mban akoma kontakte me drejtuesit e Kalmar, madje duke treguar se këta të fundit e kishin ftuar që t’u bashkohej në merkaton e shkuar verore, atë të vitit 2023.
“Drejtori sportiv më pyeti për këtë dhe folëm pak rreth gjërave. Ishte diçka spontane dhe nuk doli gjë në fund. Unë e ndjek Kalmarin dhe për fat të keq nuk e kanë nisur mirë kampionatin. Por do të vijnë kohë më të mira dhe ndeshje në të cilat të sigurojnë pikë. Ata duhet të mendojnë në mënyrë më pozitive. Unë do të dëshiroja që të ndihmoja Kalmarin për situatën në të cilën gjendet. Por nuk e di, kam ende një kontratë me Empolin dhe do të pres deri pas përfundimit të Europianit”, është shprehur portieri i Shqipërisë dhe Empolit, Etrit Berisha.
Lexo gjithashtu
