Trajneri i Rubin Kazan, Rashid Rakhimov ka folur së fundmi për Mirlind Dakun, duke u shprehur se gjendja e tij s’është aspak e mirë. Tekniku i ekipit rus, s’ka kursyer kritikat në mënyrë të tërthortë për stafin e Kombëtares shqiptare, për shkak se te kuqezinjtë, Daku është “gozhduar” në stol, duke mos marrë minuta.
“Fola me Dakun për të hequr presionin nga ai. E telefonova dje. Pasi u kthye nga ekipi kombëtar, e telefonova. I thashë se nuk më pëlqente mënyra se si po punonin në ekipin kombëtar. Ne marrim informacion për ngarkesën e punës te Shqipëria dhe Kosova dhe pamë se si punonte Daku pa luajtur. Ishte e qartë se nuk ishte i tonifikuar.
Trajneri në Kosovë është gjerman. Dhe ai nuk e ka idenë që nëse nuk luan, nuk stërvitesh. Por me Dakun, volumi ishte për të ardhur keq. E pyeta, ‘a nuk po bën asgjë?’. Po i mësojmë profesionalizëm. Po i japim një program për ta mbajtur të përgatitur. I thashë që edhe Messi ka periudha kur nuk shënon. Ju nuk duhet të mendoni për këtë, duhet të kryeni punën tuaj. Duhet të vlerësoni se si liga ka filluar t’iu trajtojë. Të gjithë po të shikojnë.
Sot bëri punë shumë të mirë dhe bëri atë që di ta bëjë më së miri. Është e qartë që ai sjell kualitet. Është i matur. E kemi ngritur dhe tani të themi se nuk mundemi pa të? Ne vetëm duhet të gjejmë lojtarë dhe të shtojmë të tjerë. Të gjithë e njohin atë, e studiojnë. Madje edhe kur ishte një sulm sot, trajneri i ekipit kundërshtar u ka bërtitur lojtarëve që mos ta lënë Dakun vetëm me një lojtar. Ai është aset”, ka thënë Rashid Rakhimov.
Lexo gjithashtu
