Kornel Predesku është zyrtarisht një futbollist i Skënderbeut. Fantazisti rumun ka firmosur për 18 muaj me korçarët ditën e sotme.
Lajmin e konfirmoi klubi i Skënderbeut përmes një njoftimi në faqen zyrtare në Facebook, ndërsa interesante ishte përgjigjja për interesimin e një tifozi, ose më saktë sugjerimin e tij për t'i dhënë Predeskut numrin "10".
Përmes komentit, klubi korçar i përgjigjej tifozit: "Ai numër është përkohësisht jashtë shërbimit", çka nënkupton se numri që ka mbajtur në fanellë ish-kapiteni Bledi Shkëmbi është tërhequr dhe nuk mund ta mbajë askush tjetër në ekip, në respekt të kontributit që ish-mesfushori i Skënderbeut ka dhënë për ekipin e tij të lindjes duke ngritur lart 6 kampionate radhazi.
Shkëmbi u tërhoq pas sezonit 2015-2016, ndërsa kampionët në fuqi të Superligës kanë pasur vështirësi në lojën e tyre gjatë këtij edicioni, duke e ndjerë jo pak edhe mungesën e ish-kapitenit, njëkohësisht ish-fantazistit të tyre.
Shpresa e drejtuesve të Skënderbeut tashmë është te Kornel Predesku, mesfushori rumun që ka firmosur me objektivin e qartë: t'i japë fantazi lojës së korçarëve.
Lexo gjithashtu
