Televizioni Publik Shqiptar ka bërë maksimumin për të mos përsëritur gabimet që bëri me Kampionatin Europian, duke i lënë shqiptarët pa parë ekipin e tyre kombëtar. Ndërsa është munduar maksimalisht që të transmetojë ndeshjet e Europa League ku luajnë skuadrat shqiptare. Javën e shkuar transmetoi Partizani – Slovan Bratislava dhe Kukësi – Rudar. Por, sot nuk do të ketë transmetim të këtij evenimenti sepse ndeshja mes Slovanit dhe Partizanit është anuluar. Kështu, RTSH me anë të një njoftimi zyrtar në “facebook” njofton publikun se po bën maksimumin që të marrë të drejtat e transmetimit për një nga skuadrat shqiptare që luan në Champions ose Europa League.
“Duke qenë se ndeshja, Slovan Bratislava – Partizani është anuluar nga UEFA, duke kualifikuar në raundin pasardhës ekipin sllovak dhe duke e lënë thjesht në dëshirën e klubeve për ta luajtur si një ndeshje miqësore, ose jo, RTSH ju bën me dije se nuk do ta transmetojë këtë ndeshje siç ishte parashikuar në program, apo njoftuar nëpërmjet spoteve televizive. Ndërkohë që RTSH po bën përpjekjet maksimale si për të transmetuar të paktën një ekip shqiptar në turin e nesërm të Europa League, apo qoftë edhe ndeshjen e turit të dytë të UEFA CHAMPIONS LEAGUE, ndërmjet Partizanit dhe Ferencváros (12 ose 13 korrik, ndeshjet e vajtjes dhe 19 ose 20 korrik ndeshjeve të kthimit). Ju falënderojmë për mirëkuptimin!”, njofton RTSH në njoftimin e saj zyrtar.