Skandalet duket se nuk kanë të ndalur në futbollin italian. Pas penalizimit të Juventusit me 15 pikë për shkak të mashtrimit financiar, tashmë është radha e Milanit të jetë në radarin e prokurorëve.
Sipas mediave italiane, Guardia di Finanzia ka nisur të sekuestrojë dokumentet e shitjes së klubit te fondi RedBird në pronësi të Gerry Cardinale, marrëveshje e cila u finalizua në 31 gusht 2022 për 1.2 miliardë euro. Hetimi ka nisur nga një ankesë e kompanisë luksemburgase Blue Sky, ish-partnerët e RedBird.
Shtatorin e kaluar, Blue Skye dhe kompania e saj mëmë “Luxembourg Investment Company” paraqitën në gjykatë një kërkesë për të bllokuar shitjen e AC Milan te RedBird, pasi sipas tyre, “nuk kishin asnjë informacion mbi këtë shitje, për të cilën ishin drejtpërdrejt të interesuara”, si dhe dyshonin për “transaksione të errëta”. Ndërkohë, në Luksemburg ishte hapur një tjetër procedim po nga Blue Skye, për anulimin e marrëveshjes që kishte çuar në shitjen e Milanit.
Kërkesat e Blue Sky nuk u morën parasysh nga Gjykata, por tashmë është Guardia di Finanzia që do të hetojë, teksa te Milani janë të gjithë në pritje se çfarë do të ndodhë. Ditët në vijim pritet të ketë edhe më shumë detaje në lidhje me këtë hetim, që tregon edhe një herë tjetër përse futbolli italian ndodhet në këtë gjendje. Një penalizim si Juventusi do të sillte një telash të madh për kuqezinjtë, të cilët nuk po kalojnë një formë të mirë edhe në kampionat, pas hunbjes 4-0 me Lazion.
Lexo gjithashtu
