Victor Osimhen është futbollisti më i kërkuari i këtyre kohëve. 24-vjeçari arriti të shpallej kampion i Italisë me skuadrën e Napolit. Nigeriani ka qenë udhëheqësi kryesor në fitimin e titullit të napoletanëve, ku ka shënuar 23 gola në 28 ndeshje në Seria A.
Presidenti De Laurentis ka thënë më para se askush nuk është në shitje nga skuadra kampione. Por sipas asaj që raportojnë mediat italiane, Chelsea është gati të bëjë çmendurinë.
Në Londër janë gati të ofrojnë 150 milionë euro për të marrë në skuadër Osimhen. Kjo ofertë do ta tundonte shumë presidentin e napoletanëve për ta lënë të lirë sulmuesin.
Por problemi i largimit nga Napoli qëndron te lojtari, pasi Chelsea nuk do të luajë në kompeticionet më të mirë të Evropës në sezonin e ardhshëm. Sulmuesi i Napolit ka prioritet vazhdimin në Champions League.
Prandaj kjo lë të kuptohet se Chelsea ka pak shanse për ta marrë atë, por si gjithmonë paratë do të flasin, dhe blutë me sa duket kanë mjaft për të bindur këdo.
Lexo gjithashtu
