Armando Dobra po kalon një sezon shumë të mirë me Chesterfield në National League në Angli. Sulmuesi shqiptar ka realizuar 9 gola e 1 asist në 29 ndeshje të luajtura duke u kthyer në yllin e skuadrës të cilën po e dërgon drejt titullit kampion.
Në një intervistë për Koha Shtesë, 22-vjeçari ka folur edhe për mundësinë e ftesës në Kombëtaren A. Dobra ka qenë një titullar i padiskutueshëm me moshat e Shqipërisë ku është paraqitur në 18 ndeshje dhe ka shënuar 2 gola.
“E kam ëndërr që të luaj me Kombëtaren A. Mund të luaj me Shqipërinë, e di që Sylvinho organizon futboll të mirë dhe unë i përshtatem atij stili. Duhet të rritem akoma më shumë dhe kam besim se brenda 1 viti do të jem pjesë e Shqipërisë. Por deri tani nuk kam pasur kontakte nga Sylvinho.
Unë i besoj vetes dhe e di që një ditë do të luaj edhe në Premier League. Ftesa në Europian do të ishte ëndërr. Ndoshta jo tani, se ka lojtarë që luajnë në nivel të lart, por pas 1-2 vitesh do të jem pjesë e Kombëtares.
Golat e Asanit? Ato gola mund të bëhen një herë në tre vite, nuk i sheh shpesh. Golat e Asanit nuk i kam parë ndonjëherë në Kombëtares, uroj që ta përsërisi edhe në Europian. Unë i kam parë të gjitha ndeshjet e Shqipërisë në shoqërinë e babait. Babai është i çmendur pas Kombëtares, kemi ndjekur edhe ndeshjet e Europianit kur isha 15 vjeç.
Sylvinho mund të më kërkojë pasi unë jam një futbollist që i gënjej lojtarët në driblim dhe krijojë hapësira për shokët e ekipit. Uroj që të luaj një ditë me Armando Brojën aty, është padyshim modeli im pasi po luan në Premier League. Por te Kombëtarja ka shumë lojtarë të tjerë të mirë.
Nëse unë do të grumbullohem për në Europian, kam besim dhe parandjenjë se do t’i shënoja gol Italisë. E di që është thuajse e pamundur, ndoshta jo 0%, por më duhet të rritem ende për të mbërritur te Kombëtarja”, tha Dobra.
Lexo gjithashtu
