Mbrojtësi i Kukësit, Albi Alla ka folur për mikrofonin e Supersport, ku ka zbuluar dëshirën e madhe që ka për ecurinë e skuadrës së tij në Champions League. Nënkampionët e Shqipërisë do përballen me Karabakun e Agollit dhe kjo gjë sigurisht që e gëzon pogradecarin.
Ndër të tjera, 25-vjeçari ka zbuluar se ka dëshirë të ndihmojë ekipin, por pavarësisht kësaj gjëje, do të jetë trajneri Cungu ai që do të vendosë, për të cilin ai thekson se ka konsideratë.
"Kalimi i turit është një gjë e mirë edhe për ekipin e Kukësit, edhe futbollin kuksian dhe shpresojmë të kemi një vazhdimësi të mirë. Ky është ekip i ri, besoj që dita-ditës po gjejmë veten. Me ardhjen e Cungut ekipi do të gjejë qetësinë dhe moralin që duhet. Por në këtë kompeticion rëndësi ka të marrësh kualifikimin se edhe vjet Kukësi luajti futboll të mirë por nuk arriti të marrë kualifikimin. Besoj që e rëndësishmja është që thjesht të marrësh kualifikimin. Unë jam gjihtmonë i gatshëm të jap maksimumin për ekipin, pastaj është zgjedhja e trajnerëve. Unë bëj më të mirën për ekipin. Kjo është një ndeshje e fortë, do të shkojmë për fitore si në çdo ndeshje. Shpresojmë të kemi fatin me vete e të kalojmë. Do të shohim ndeshjet me radhë, qëllimi është gjithmonë për sukses por t'i marrim ndeshjet një nga një, të shohim pastaj se ku do të shkojmë. Shpresojmë të kemi sukses dhe të arrijmë grupet", është shprehur Alla për Supersport
