Kombëtarja e Kosovës U19 në konkurrecën e vajzave ka filluar parapërgatitjet për kualifikimet e Kampionatit Evropian 2025 të kësaj grupmoshe, të cilat zhvillohen në Gjermani. Të akomoduara në Kampin Nacional në Hajvali, Dardanet e reja të ftuara nga ligat vendore dhe diaspora, sot u paraqitën të kompletuara si skuadër në fushë, duke zhilluar stërvitje taktike dhe duke treguar që në start të këtij grumbullimi performancën e tyre.
Kosova U19 të premten do të zhvillojë një ndeshje ndaj Kombëtares A dhe ky do të jetë një test i mirë për të parë forcën e "Dardaneve" të reja përballë skuadrave të forta, me të cilat do të përballen në muajin nëntor.
Përzgjedhësja Albina Rrahmani është e lumtur pasi të gjitha futbollistet janë aktive nëpër skuadrat e kampionateve të tyre. “Po shohim kualitet tek vajzat dhe jemi me fat që kanë qëlluar ndeshjet në vazhdimësi të kampionatit tonë dhe atyre që janë jashtë dhe kjo është një plus për ne. Stërvitjet po shkojnë shumë mirë, disa vajza janë të ftohura por shpresojmë se do t’ju kaloj. Po besojmë se do të jetë një test i mirë ndeshja testuese kundër Kombëtares A, pasiqë në nëntor do të përballemi me Gjermaninë, Danimarkën dhe Greqinë, e të cilat janë superfuqi. Ne kemi kërkuar që të kemi një ndeshje testuese me një ekip më të fortë, që të përgatitemi për atë që na pret. E mira e krejt këtyre grumbullimeve është që shumë vajza të ekipit U19 i janë bashku ekipit A dhe ky eshtë qëllimi i të gjitha gjeneratave që ne i kemi”, u shpreh Rrahmani.
Futbollistja Mirjeta Januzi, që jeton në Gjermani është e lumtur me ftesën e Kosovës dhe beson se me përgatitjen e mirë do t’i bëjnë ballë kundërshtarëve të tyre si Greqia, Danimarka e Gjermania që janë shumë të fortë e një nivel para në çdo drejtim.
“Unë jam shumë krenare që më kanë ftuar në këtë grumbullim të përgatitem për Gjermaninë sepse kur ushtrojmë mirë mund ta mposhtim edhe Gjermaninë, dhe do ta japim maksimumin në dhjetor. Në këtë stërvitje të gjitha e kemi dhënë maksimumin dhe e kemi mundësinë të luajmë bashkë, që të përgatitemi sa më mirë për ndeshjen e nëntorit”, u shpreh Mirjeta në intervistën.
Për Sahare Berishën ndeshja testuese me Kombëtaren A të Kosovës do të jetë mundësi e mirë jo vetëm për t’u parapërgatitur për muajin nëntor, por edhe për t'a dëshmuar veten.
“Stërvitja ka qenë shumë e mirë dhe besoj se do të na shërbej për ta njohur më shumë njëra – tjetrën. Stërvitja ka qenë taktike dhe na ka ndihmuar të mësojmë se si t’i mbajmë pozitat tona. Sa i përket ndeshjes testuese me Kombëtaren A të Femrave, kjo do të jetë mundësi e mirë për ne që t'a tregojmë veten pasi secila prej nesh e sheh veten në ekipin A”, tha Berisha.
Lexo gjithashtu
