Albian Ajeti është një nga ata futbollistë që kanë refuzuar si Shqipërinë, ashtu edhe Kosovën për të veshur fanellën e Kombëtareve të tjera, Zvicrës në rastin e tij. Vite më parë, kur ai shpërtheu në rradhët e Basel, u kthye në një emër të nxehtë merkatoje falë paraqitjeve të tij.
E sigurisht, vjen edhe interesi nga ekipet kombëtare me Shqipërinë që po niste një cikël të ri fitues pas Euro 2016, ndërsa Kosova ‘lindi’ për herë të parë në aspektin futbollistik. Federatat respektive i bënë ftesën zyrtare, por morën mbrapsht një përgjigje negative.
Albian Ajeti, vëllai i Arlindit që do të jetë titullar në Euro 2024, zgjodhi të përfaqësojë Zvicrën duke refuzuar ngjyrat kuqezi si dhe ftesën direkte të Fadil Vokrrit të ndjerë.
Sot 6 vite më parë, legjenda e futbollit dardan, nismëtari i misionit “Futboll për Kosovën” dhe ish-presidenti i Federatës së Futbollit të Kosovës, u nda nga jeta pas një sëmundje të rëndë.
Në këtë ‘ditë zie’ të futbollit dardan, mesazhet janë të shumta nga figurat sportive që përkujtojnë legjendën Fadil Vokrri. Mes tyre është edhe ai i Albian Ajetit, i cili ndan një foto të vjetër të tijën me Vokrrin nën diçiturën: Përgjithmonë do të kujtohesh, Legjendë.
Lexo gjithashtu
