Kosova do të luajë më 5 shtator ndeshjen e parë zyrtare për një kompeticion zyrtar siç është Kupa e Botës “Rusi 2018”. Kosova do të marrë pjesë për herë të parë, por që ndjen të detyrueshme që të ketë sa më shumë lojtarë cilësorë në përbërje.
Dihet që shumë futbollistë të talentuar të shtetit më të ri në botë luajnë për Zvicrën, Shqipërinë apo edhe për shtete të tjera europiane, por që tashmë FFK-ja i ka thirrur që të bëhen pjesë e skuadrës mëmë për të ardhmen.
Për këtë, presidenti i FFK-së, Fadil Vokrri ka folur për mediat kosovare në përfundim të ndeshjes së Superkupës mes Ferronikelit dhe Prishtinës, e cila u fitua nga kryeqytetasit. Vokrri shprehet se disa lojtarë kanë bërë kërkesën në FIFA dhe të tjerë presin që ta bëjnë, duke konfirmuar që Kosova do të ketë një skuadër solide për t’u përfaqësuar denjësisht në eliminatoret e Kupës së Botës.
“Kemi disa vështirësi ligjore, nuk e dimë ende me çfarë kuadro kemi të bëjmë, nuk dihet cilët lojtarë i kemi në dispozicion, përveç këtyre që kanë luajtur deri më sot. Disa lojtarë i kanë bërë kërkesat, disa kanë shprehur dëshirën dhe presim ta bëjnë edhe ata me shkrim. Pas 2-3 ditësh mund ta kemi më të qartë situatën se kush do të na bashkohet”.