Janë luajtur sot dy ndeshjet e radhës të Kategorisë Superiore, të vlefshme për javën e katërt për moshat U-21. Tirana ka triumfuar 2-0 kundër Korabit, kurse Partizani 2-1 me Teutën. Bardheblutë s’e kanë diskutuar në asnjë moment fitoren teksa kanë realizuar golin e parë me Nikqin në fundin e pjesë së parë. Edhe pse dibranët u munduan të reagojnë, skuadra e drejtuar nga Gent Muça ishte mjaft në formë. Në minutën e 84-të, Korabi mbeti me 10 vetë pas daljes me karton të kuq të Rahimit. Dhe për të vulosur sfidën mendoi Tafa që shënoi në minutën e 90të.
Ndryshe situata në ndeshjen e Partizanit. Ekipi i Gerd Haxhiut mori 3 pikë të rëndësishme, por fundi i takimit u mbyll me 18 lojtarë. Katër futbollistë u ndëshkuan me kartonë të kuq, në një përballje që dhuroi gjithçka. Pjesa e parë u mbyll me rrjeta të paprekura. Ndërsa në të dytën ishte Partizani që shënoi dy herë radhazi me Vrenozin në minutën e 61-të dhe Çarçanin 3 minuta më vonë. Për të kuqtë dolën me kartonë të kuq, Çela dhe Brahimi që u ndëshkuan me të dytin e verdhë, kurse për durrsakët Duka dhe Treni. Goli i vetëm për Teutën u shënua në minutat e fundit nga Salillari nga pika e bardhë e penalltisë.
Lexo gjithashtu
