Administratori i klubit Flamurtari Sinan Idriz ka reaguar për çështjen më të fundit, teksa ka deklaruar që ish trajneri i Flamurtarit, Ernest Gjoka nuk do të marrë asnjë qindarkë nga klubi vlonjat, pasi ai ka një kontratë personale me ish-kreun e bashkisë Shpëtim Gjika.
"Bashkia nuk e njeh detyrimin ndaj Ernest Gjokës, madje mesa di unë ajo do t'i drejtohet CAS për këtë çështje, pasi kontrata me ish-trajnerin është lidhur individualisht mes palëve. As unë nuk mund ta paguaj pasi nuk është borxhi im. I bëj thirrje miqësore ish-kryetarit Gjika që të shlyejë 45 mijë eurot ndaj Gjokës", deklaroi Idrizi për "Panorama Sport".
Administratori foli dhe për Borxhin ndaj Veliut, për të cilin tha: "Nuk i detyrohemi as Veliut, as ndonjë tjetri. Dihet që 20% e kontratës u mbahet peng lojtarëve për sigurimet shoqërore, ndërsa 10% u është mbajtur si gjobë të gjithëve".
Idrizi nuk la pa përmendur Federatën, duke e etiketuar si një institucion abuzues.
"FSHF është institucion abuzues, nuk njeh detyrimin e tatimit mbi pagesën, nuk njeh sistemin kapitalist, e quan rrumpallë gjithçka. Drejtuesi e FSHF-së nuk njohin sistemin e taksave. Më vjen keq që kampionati shqiptar është kthyer në një OJQ. E dini ju se federata i mban disa skuadra në OJQ?! Për të gjitha këto që bën FSHF-ja do t'i drejtohemit CAS-it", deklaroi Idrizi.
Gjithashu administratori Idrizi dha një mesazh për Veliun dhe këdo që do të bëhet pjesë e Flamurtarit: "Dera e Flamurtarit është e hapur për çdo futbollist vlonjat. Nëse duan të vijnë të luajnë, janë të mirëpritur. Kjo vlen si për Franc Veliun, si për ndonjë tjetër", përfundoi administratori i klubit vlonjat.
Lexo gjithashtu
