Tirana ka mposhtur sot 4-0 Teutën në “Selman Stërmasi”. Dueli që çeli javën e pestë të Superligës foli për bardheblutë, që dominuan 90 minutëshin. Tripletë e Xhixhës dhe një gol i Hasanit bënë që kampionët e vendit t’i shkaktonin durrsakëve të Shkëmbit humbjen më të thellë këtë sezon.
Me një ndeshje më shumë se të tjerët, Tirana me 8 pikë ndodhet në vendin e dytë, një pikë më pak se Partizani kryesues. Teuta mbetet në vendin e parafundit me 3 pikë.
Pas ndeshjes për Oversport foli trajneri i Teutës, Bledi Shkëmbi.
“E nisëm lojën mirë, u munduam të bllokonim pikat e forta. Patëm 2 momente shumë të mira që mund të kishim shënuar. Siç e patë edhe ju, pas goli të pësuar nuk ishim ajo skuadër që duhej. Në pjesën e dytë u ndëshkuam shpejt dhe u bëmë ekip i gjatë, nuk kishim më besim te vetja për të bërë gjërat mirë.
Golat – Në fazën mbrojtjëse kemi gabuar si skuadër, më vjen keq sepse nëse shënon kthehet gjithçka në favor. Kemi probleme në mesin e fushës. Kemi edhe dëmtime. Dy javë pushim na bëjnë të na kthehen lojtarët që kemi me probleme, nuk do jetë më kjo Teutë që keni parë.
Çfarë mund të bënit ndryshe? Detyrat i bëmë deri diku mirë, gabuam te goli i parë. Duke parë që topin e kishte Xhixha, mund të bëhej edhe faull. Gabuam në mbrojtje dhe më pas në çdo gjë, në mbrojtje, qarkullim dhe në anën psikologjike. Ju takon lojtarëve me eksperiencë që të marrin përsipër situatën dhe të kalonim këtë gjë. Kjo gjë nuk ndodhi dhe ne na humbi besimi. Duke parë stolin, bëmë maksimumin me ata që kishim. Çdo repart duhet të ketë lojtarët e duhur, janë vetëm dy në qendër me mungesat që kemi.
Gjinollari më ka pëlqyer shumë në stërvitje këto ditë që kam qenë në ekip. Idrizi nuk është se bëri keq, menduam që Gjinaollari do na jepte më shumë në sulm, do na ndihmojë shumë.
Ndërrimi i veteranëve dhe gjendja fizike – Të ndërrosh sulmin diçka nuk shkon, ndodhin në futboll. Duke pasur parasysh kundërshtarin, lojtarët vuajtën. Hebaj pati probleme psikologjike me rastin e humbur. Më pas ndërhymë në mesin e fushës për të nxjerrë topin dhe pasa për sulmuesin.
Presim rikthimin e lojtarëve të dëmtuar dhe përmirësimin e gjendjes fizike në këto javë pushim”, tha Shkëmbi.
Lexo gjithashtu
