Kukësi arriti të merrte një fitore të rëndësishme 1-0 kundër Laçit në shtëpi me në krye trajneri Rrahman Hallaçi. Ndeshja e dytë kjo për ish mbrojtësin që është në krye të verilindorëve i cili merr fitoren e parë.
Ai foli për mikrofonin e Oversport, ku nuk e fshehu lumturinë. Megjithatë ka ende punë që ekipi të shkojë aty ku duhet. Në fjalën e tij për gazetarët Hallaçi deklaroi:
“Jam i kënaqur, normalisht donim ta mbyllnim me fitore. Nuk na pëlqen aty ku jemi për momentin. Shpresoj që kjo të jetë një pikënisje. Duhet t’i shohim gjërat me qetësi. Skuadra është ndërtuar për të qenë në krye. Skuadra ka bërë mirë, ka treguar grintë dhe karakter. Jam shumë i kënaqur për sakrificën. Na pret një rrugë e gjatë, e vështirë. Kemi edhe Kupën. Kukësi gjithmonë është futur për trofe. Mund të bëjmë pak lëvizje në merkato. Kjo skuadër ka cilësi, ka vlera. Futbollistët kanë cilësitë e duhura. Duhet pak kujdes. Çdo trajner ka modulin e vet. Mendoj që në këtë kohë të shkurtër kemi përmirësuar diçka.
Kukësi i Hallaçit? Ishte një ndeshje që e meritonim. E treguam edhe në ndeshjen me Partizanin se ekipi di të reagojë.
Merkato? Duhet të jemi të kujdesshëm. S’dua të flas për momentin. Do të ketë 2-3 largime. Por, s’e kemi me urgjencë. Janë disa lojtarë që më dhanë sinjale të mira. E thashë në përgjithësi nëse do të largohen 2-3 lojtarë, do të shohim. Nëse nuk largohen, jam i kënaqur me këta futbollist. Është gjynah, kanë bërë ndeshje të mira edhe më parë. Ndoshta s’kanë pasur edhe fatin me vete. Sot i kemi bërë të gjitha.
E ardhmja? Unë jam brenda familjes. Kam marrë pjesë vazhdimisht në merkaton e futbollistëve. Jam dhe te U-21. Vazhdoj të jem aty afër. Kam dhënë maksimumin. Do të flas me drejtuesit dhe do të shohim. Fjala e fundit është e atyre.
Kapiten apo trajner? Ju jeni rehat i them lojtarëve sepse mbaroni stërvitjen dhe ikni. Ndërsa ne kemi punë me letra. Është e vështirë të jesh trajner. Por të jep kënaqësi.
Oreksi? Duhet të bëjmë kujdes, por nuk jemi aq të lumtur me renditjen që jemi. Duhet të jemi të kujdesshëm por nuk do të festojmë. S’është momenti.
Skema? Nuk është se preferoj me të njëjtin rreshtim. Ndaj Partizanit e ndryshuam. Varet sipas kundërshtarit. Gjithmonë duke parë edhe lojtarët që kanë kundërshtarët”, tha ai.
Lexo gjithashtu
