Gilman Lika ka folur për "TV1 Channel" ku ka treguar që do të luajë për Vllazninë deri në fund të sezonit. Mesfushori shkodran ka zbuluar gjithashtu edhe bisedën e tij me Xhevahir Sukajn, ku është shprehur se sulmuesi i njohur ka dhënë fjalën për t'iu bashkuar Vllaznisë në gjysmën e dytë të sezonit.
TRIUMFI ndaj Kamzës: "Fitorja ndaj Kamzës ishte shumë e rëndësishme për ekipin tonë. Na duhej ky trepikësh, për vetë situatën në të cilën ndodhemi. Kemi bërë një lojë të mirë, pavarësisht se kishim momente edhe jo të mira. Mund të them se përballë kishim një kundërshtar të fortë, por nuk na falet që, edhe pse shkuam 3-1, të rrezikonim deri në fund. Këto janë gabimet tona, por ishte një ndeshje ku ndikoi edhe lodhja nga takimi në Kupë"
Humbja e Partizanit në Gjirokastër: "Për fatin tonë të mirë, ne kemi luajtur përpara se të zhvillohej takimi mes Luftëtarit dhe Partizanit. Nëse ndodhte ndryshe, do të ishte një presion psikologjik i madh mbi ne pas asaj fitoreje të gjirokastritëve. Megjithatë, bëmë më të mirën e mundshme, duke marrë fitoren në momentin e duhur".
Transferta kundër Partizanit: "I ka të dyja anët e medaljes, pasi kur humbet ndeshje si Partizani në Gjirokastër, ekipi karikohet edhe më shumë që të bëjë kthesën në sfidën e radhës. Është një përballje e vështirë për ne, por që do të kërkojmë të marrim maksimumin. Gjithnjë në Tiranë kemi zhvilluar takime të bukura dhe të njëjtën gjë do të bëjmë edhe të premten".
Parashikimi - "Faza e dytë nuk mbyllet këtë muaj, kështu që është herët për të folur. Ne duhet të bëjmë mirë në takimin e fundit me Partizanin. Do të ishte shumë pozitive nëse e mbyllim vitin me një fitore. Gjithsesi, unë nuk e mendoj që Vllaznia do të rrezikoj deri në fund. Normalisht që pritet që ekipi të paraqes një fytyrë tjetër në vitin e ardhshëm.
Sukaj - "Ardhja e Xhevahirit do të na bënte shumë punë. Unë e kam mik dhe kam folur kohët e fundit. Shanset për të ardhur në Shkodër janë të mëdha dhe shpresoj që ai të bëhet pjesë e skuadrës. Me aq sa kam folur, por edhe në bisedat që ai ka bërë me drejtuesit, di të them se, në rast se nuk gjen diçka jashtë Shqipërisë, besoj se do të jetë i Vllaznisë. Të paktën, kështu më ka dhënë fjalën".
Lexo gjithashtu
