Kategoria Superiore mbylli javën e 26-të të kampionatit e cila kulmoi me derbin Tirana - Dinamo, ku bardheblutë fituan me rezultatin 3-2. Fitore tepër të rëndësishme morën Skënderbeu dhe Teuta që triumfuan ndaj Egnatias dhe Partizanit duke prekur objektivat e tyre, ndërsa Kukësi ishte befasia që mposhti pas 13 javësh Vllazninë.
Në këtë panoramë të javës së 28-të, Neësport.al ka përzgjedhur formacionin më të mirë të këtij raundi. 11 lojtarë që shkëlqyen me skuadrat e tyre dhe një vend të rëndësishëm për trajnerin më të mirë i cili drejtoi ekipin e tij drejt suksesit.
-FORMACIONI I JAVËS-
Leon Kozi (Tirana) – Gardiani u kthye në një makth për sulmuesit e Dinamos, veçanërisht, Denisson i cili në plot 4 goditje drejt portës, iu mohua festa e golit nga portieri i bardhebluve. Pritje të njëpasnjëshme që i dhanë Tiranës komoditetin për të qenë të sigurtë në prapavijë. Mirëpo, vjen një moment kur ‘tradhtohet’ nga mbrojtja… sërish. S’mund të bënte më tepër të golat e pësuar, edhe pse te i pari iu desh të fluturonte për të devijuar në limit topin, por pa fat.
Ergys Peposhi (Teuta) – Lojtarët lider dhe ata që marrin mbi shpatulla ekipin nuk mund të jenë në çdo ndeshje në nivelin më të mirë të mundshëm. Një lider të nxjerr nga situata edhe kur s’është në formën e duhur. Kështu bëri Peposhi. Ndaj Partizanit vuajti një shqetësim të javës së kaluar, por dhuroi një gol kandidat për më të bukurin e vitit. Gol me vlerë 3 pikë ndaj kampionëve në fuqi.
Nehar Sadiki (Erzeni) – Diga e shijakasve para mbrojtjes. Ndaj Laçit u mbyll pa gola dhe një dorë të fortë për këtë rezultat e ka Sadiki. Fitues i çdo dueli, tokësor e ajëror, e bëjnë qendërmbrojtësin ndër më të mirët e kësaj jave.
Vasil Zhongo (Kukësi) – Kur përballë ke dy kryegolashënuest e Superiores, Bekim Balaj e Ildi Gruda, dhe arrin të mbash zonën dhe portën e paprekur, kjo është një arritje për t’u vlerësuar maksimalisht. Zhongo izoloi bomberin shkodran, ndihmoi Kukësin të mos pësonte dhe i dha skuadrës qetësi në prapavijë.
Gledi Mici (Tirana) – Këtë sezon, thuajse asnjëherë nuk ka luajtur në pozitën e tij natyrale. Pas eksperimenteve si mbrojtës i djathtë, ndaj Dinamos u rreshtua në qendër. Performancë solide e cila u vlerësua edhe nga trajneri Fagu që e komplimentoi për markimin e duhur ndaj Luis Kaçorrit.
Fjoart Jonuzi (Tirana) – Titullar dhe minuta të plota sërish. Mesfushori ka rigjetur formacionin titullar dhe paraqitja e tij vjen në ngritje nga java në javë. Hero i padiskutueshëm në derbi ku me golin e tij i dha fitoren bardhebluve. Jo vetëm gol, por gjatë gjithë lojës ishte prezent në aksionet e Tiranës, madje në golin e parë, vertikalizoi një super-krosim për Abazajn i cili asistoi për Nikqin.
Asion Daja (Teuta) – Eksperienca e tij është jashtë mase e vyer. Në një Teutë me lojtarë të rinj si Beqja, Lloci, Peposhi, Daci e Gjinollari, Asion Daja duket si profesori apo trajneri i dytë në fushë që udhëzon të rinjtë. Ndaj Partizanit neutralizoi mesfushën kundërshtare, detyrë shumë e vështirë për t’u bërë duke parë emrat e të kuqve.
Yuri Merlim (Skënderbeu) – Nga ata lojtarë që duket sikur nuk është prezent fare në fushën e lojës, por kur sheh analizën në përsëritje, vihet re se braziliani është shtyllë e rëndësishme në secilin prej aksioneve të korçarëve. Të dominosh mesin e fushës përballë lojtarëve si Zejnullai, Aleksi e Fernando nuk ndodh gjithmonë. Dhuroi edhe një asist te goli i dytë.
Moustapha Salami (Kukësi) – Rreziku numër 1, ndoshta dhe i vetmi, që vjen nga ekipi i Kukësit. Anësori shkëlqen çdo javë pavarësisht rezultatit. Nga 9 skuadra kundërshtare, të 9 mbrojtësit e majtë të ktyre ekipeve vuajnë kur kanë përballë 22-vjeçarin. Sa herë Kukësi shënon, Salami është ose autori ose asistuesi. Kësaj rradhe ishte asistuesi, edhe pse arriti të fuste një top në rrjetë, por një prekje e lehtë me dorë i mohoi festën.
Nicolai Solodovnicov (Kukësi) – Moldavi i verilidnorëve rikthehet të bëjë bomberin duke shënuar të 2 golat në fitoren surprizë ndaj Vllaznisë. Nuhat mjaft mirë aksionin në golin e parë duke përfituar nga kontrolli jo i duhur i topit nga portieri kundërshtar. Tek goli i dytë, sërish ndjek Salamin paralelisht në zonë dhe tund sërish rrjetën për t’i dhënë 3 pikë të arta verilindorëve.
Frenklin Ahanonu (Skënderbeu) – E njëjta si Solodovnicov mund të thuhet edhe për bomberin e korçarëve. Nuhatës i frikshëm i golit, shënon 2 herë në rrëmujën e mesit të zonës dhe hedh “KO” Egnatian kryesuese.
Trajner: Bledar Devolli (Kukësi) – Kukësi ka një rritje të dukshme në javët e fundit dhe një dorë për këtë ka padyshim trajneri i ri. Devolli ka rikthyer shpresën në skuadër. Ndaj Vllaznisë dukej një ekip i qartë në lojë, duke shfrytëzuar pikat e veta të forta dhe pikat e dobëta të kundërshtarit. Fitore e pastër 2-0 dhe porta e paprekur. Ç’mund të kërkosh më shumë?
Lexo gjithashtu
