Kapiteni i Napolit dhe mbrojtësi i Italisë, Giovanni Di Lorenzo ka folur para mediave në prag të ndeshjes që përfaqësuesja “azurre”, do të luajë përballë Shqipërisë në Euro 2024. Pavarësisht problemeve me Napolin në kohët e fundit për shkak se futbollisti ka kërkuar largimin, ky i fundit shprehet se është i fokusuar te Europiani momentalisht.
“Jam shumë i qetë, jam duke u përgatitur për këtë kampionat të dytë europian dhe është diçka e bukur. Mund të duket normale, por për mua jo. Kam ardhur nga fundi dhe tani jam krenar që jam pjesë e ekipit në Europian. Kemi përqendrimin maksimal në këtë kompeticion dhe duhet të lë mënjanë sezonin e keq me Napolin dhe të marrim rezultatet më të mira të mundshme.
Dëgjoi që thonë se jam i trishtuar apo i heshtur, është marrëzi. Këto janë gjëra të pavërteta dhe sigurisht njerëzit dëshirojnë që të merren me këtë. Unë jam shumë i qetë dhe i gatshëm për të përballuar këtë kampionat evropian me Italinë. Pastaj, kur t’i vijë koha do të flas për Napolin. Por tani gjëja më e rëndësishme është të qëndrojmë të fokusuar te Euro 2024”, është shprehur mbrojtësi i djathtë.
Lexo gjithashtu
