Trajneri i Dinamo City, Luigi Di Biagio, foli në konferencën për shtyp në prag të derbit me Partizanin, nesër në orën 18:00 në Elbasan Arena. Tekniku italian në fjalën e tij para gazetarëve theksoi se nuk firmos kurrë për barazim dhe se Dinamo e tij futet gjithnjë për fitore, pavarësisht kundërshtarit.
“Derbi është ndeshja më e lehtë për t’u përgatitur nga ana mentale, pasi futbollistët janë më të karikuar. Renditja e Dinamos me lojërat që kemi bërë të gënjen, por ky është futbolli.
Loja e mirë, por pa pikë? Kemi luajtur mirë me Tiranën dhe kemi humbur, kemi luajtur jo mirë ndaj Kukësit dhe kemi fituar. Pra, futbolli i tillë është, por tashmë duhet të luajmë mirë dhe të fitojmë.
I kënaqur me barazim? Në jetën time nuk firmos kurrë për një barazim, edhe kur luaja me kombëtaren italiane ndaj kundërshtarëve shumë të fortë si Brazili, gjithnjë doja fitoren.
Me gjithë respektin për rivalin, që është edhe kampioni i Shqipërisë, Dinamo hyn në çdo ndeshje për të fituar. Kjo është ajo që u përcjellim edhe futbollistëve, të kërkojnë deri në fund të çdo ndeshje të marrin maksimumin.”
Lexo gjithashtu
