Norvegjia e nisi me fitore rikthimin e saj në Kupën e Botës pas 28 vitesh, duke mposhtur Irakun me rezultatin 4-1. Përtej suksesit në fushë, sfida e zhvilluar në Foxborough hyri në histori për një statistikë të veçantë që lidhet me brezat e futbollistëve norvegjezë.
Sipas të dhënave të publikuara nga MisterChip, Norvegjia u bë kombëtarja e parë në historinë e Botërorëve që aktivizon njëkohësisht tre lojtarë, baballarët e të cilëve kishin luajtur më parë në Kupën e Botës. Bëhet fjalë për Alexander Sorloth, Erling Haaland dhe Christian Thorstvedt.
Baballarët e tyre, Goran Sorloth, Alf-Inge Haaland dhe Erik Thorstvedt, ishin pjesë e përfaqësueses norvegjeze që mori pjesë në Botërorin e vitit 1994 në Shtetet e Bashkuara. Më shumë se tri dekada më vonë, djemtë e tyre ndanë fushën në të njëjtin vend, duke krijuar një lidhje të rrallë mes dy brezave.
Ky rekord i veçantë e bëri edhe më të paharrueshme mbrëmjen e Norvegjisë, e cila rikthehet në skenën më të madhe të futbollit botëror me ambicie të mëdha dhe me një brez lojtarësh që po shkruan historinë e vet.
Lexo gjithashtu
