Milan do të presë Interin në “San Siro” për të bërë mes tyre llogaritë e derbit, sfidë e vlefshme për javën e 33-të të Serie A. Takim që do të luhet ditën e nesërme në orën 20:45. Një duel që vjen më shumë se 3 pikët për të dyja skuadrat që kërkojnë vetëm fitoren.
Zikaltërtit vijnë si kryesues në këtë përballje, teksa ndodhen në vendin e parë me 83 pikë, 14 pikë më shumë se kuqezinjtë. Fitorja ditën e nesërme në derbi do t’i shpallë kampionë të Scudettos, të cilët do të festonin yllin e dytë në fanelë para syve të rivalëve të përjetshëm të qytetit.
Simone Inzaghi ka folur për këtë përballje, teksa ka theksuar se ekipi i tij ka punuar shumë dhe se ka ndjesi pozitive se do të dalin fitimtarë. Ndër të tjera nënvizoi se:
“Derbi mbetet gjithnjë një derbi, dhe unë kam ndjesi pozitive. Këto ditë kemi punuar shumë dhe e hëna mund të jetë një ditë speciale për ne, duhet të zhvillojmë një ndeshje të madhe. Kemi bërë një rrugëtim shumë të bukur në këtë sezon, jemi shumë pranë arritjes së objektivit.
I kemi fituar pesë derbit e fundit, por kjo nuk do të thotë asgjë. Përballë do të kemi një skuadër që do të bëj gjithçka për të na e vështirësuar jetën. Sigurisht që në futboll trofetë kanë shumë rëndësi, por unë jam i lumtur edhe për frymën që kemi krijuar në këtë klub.
Jetoj në Milano prej tre vitesh dhe menjëherë pas tre muajve të parë, tifozët më komplimentonin për lojën e skuadrës, pavarësisht renditjes në klasifikim dhe për mua nuk ka kënaqësi më të madhe. Kanë qenë tre vite shumë intensive, kemi fituar shumë, por edhe kemi humbur. Por, nuk jemi shqetësuar pas humbjeve dhe kemi punuar njësoj, kam pasur fatin të kem në dispozicion lojtarë të mëdhenj.
Cikli i Inter duhet të vijojë me patjetër, drejtuesit kanë filluar të lëvizin që kjo skuadër të ketë vazhdimësinë”.
Lexo gjithashtu
