Milan dhe Sassuolo nuk shkuan më shumë se barazimi 3-3 mes tyre. Një barazim që padiskutim nuk i ka lënë shije të mirë Stefano Piolit.
Trajneri i kuqezinjve është i kënaqur me shpirtin e garës së lojtarëve, por kurrsesi nuk pranon gabimet që futbollistët bërë në disa fraksione të lojës. Ndër të tjera Pioli do të nënvizonte se skuadra e tij mund të shënonte 5-6 gola pasi kishin gjatë gjithë kohës kontrollin e lojës.
Dy takime mjaft të rëndësishme ka Milan në paak ditë. Timonieri i kuqezinjve shprehet i sigurtë se skuadra e tij në Romë do t’ia dalë të fitojë dhe përmbysë sfidën e parë dhe për t’u kualifikuar në gjysmëfinalen e Europa League, ndërkohë sa i takon derbit me Interin, nënvizon se ‘djemtë’ e tij do të luajnë për tifozët.
“Jeni i kënaqur me paraqitjen e skuadrës ndaj Sassuolos? Jam shumë i kënaqur me shpirtin që treguam, por është e qartë që duhet të shmangim pakujdesitë si ato në fillim të ndeshjes, që na kushtuan dy gola. Kishim kontrollin e lojës dhe mund të shënonim 5 apo 6 gola sot, ndaj jam shumë i kënaqur për atë që dhamë.
E prisnit një reagim të tillë nga Leao? Ai është një lojtar me cilësi të jashtëzakonshme dhe nuk kisha dyshime për reagimin. Ai duhet të mësohet me këtë lloj presioni, pasi ka shumë pritshmëri rreth tij dhe pas çdo paraqitjeje negative, do të vihet në qendër të vëmendjes. Është në formë dhe po e tregon në fushë.
Çfarë ndeshjeje prisni të enjten në Romë? Duhet të bëjmë ndeshjen tonë më të mirë, pasi vetëm kështu mund t’ia dalim të përmbysim humbjen dhe të kualifikohemi. Është e qartë që ata bënë një ndeshje fantastike në Milano, por ne e dimë që mund të bëjmë shumë më tepër dhe do të luajmë shanset tona.
A janë ndeshjet e ardhshme vendimtare për të ardhmen tuaj në stolin e Milanit? Për mua nuk ndryshon asgjë, pasi i marr ndeshjet me radhë dhe mund të them se takimi i radhës është më i rëndësishëm. Për të ardhmen duhet të presim përfundimin e sezonit, pasi aty bëhen llogaritë dhe merren vendimet.
A mund t’ia shtyni Interit festën e titullit? Interi do ta fitojë titullin këtë sezon pasi e ka merituar me atë që ka treguar në fushë. Në derbi do të provojmë të fitojmë për t’u dhënë kënaqësi tifozëve tanë, të cilët do të jenë të shumtë në stadium dhe kaq”, ka përfunduar Pioli.
Lexo gjithashtu
