Vllaznia e basketbollit për meshkuj ia doli që të mposhtë në gjysmëfinalet e Kupës së Shqipërisë, Teutën ( 25-18, 49-37, 73-52, 80-83 ), në një ndeshje delikate dhe emocionuese deri në fund. Shkodranët do të përballen në finale me Goga Basket, në ndeshjen që do të zhvillohet në "Feti Borova" të kryeqytetit.
Vllaznia e basketbollit zhvilloi një ndeshje të madhe në parket, me ekipin e malazezit Darko Vujaçiç që përmbysi gjithçka në favor të vet në 10 minutat e fundit të takimit. Perioda e tretë u mbyll me një diferencë "të frikshme" për Teutën, me djemtë e Vllaznisë që nuk u demoralizuan dhe kthyen ndeshjen në favor, duke e mbyllur me tri pikë përpara.
Në lidhje me këtë ndeshje, finalen e sotme, Ligën Ballkanike dhe të ardhmen e basketbollit shkodran, ka folur edhe Blendi Dibra, që mban postin e Sekretarit të Përgjithshëm të klubit "Vllaznia". Për Newsport.al, Dibra tregoi se ndeshja e fituar në frymën e fundit tregoi edhe njëherë se ekipi është aty dhe investimet serioze u treguan në fushë. "U turbulluam", thotë ai për tre periodat e para. Mes entuziasmit të përmbysjes dhe finales, Dibra tregoi se Kupa do të kthehet aty ku e meriton.
Fitore e "çmendur" në fund. Pse kjo vuajtje e ekipit?
E drejtë. Ishte një ndeshje ndaj një kundërshtari serioz dhe ne e kishim vlerësuar maksimalisht. Ndodh që ndonjëherë, edhe sipas specialistëve ekipi të "turbullohet" dhe të humbasë përqëndrimin, por falë eksperiencës dhe cilësive që kemi, ia dolëm që të bëjmë një ndeshje të madhe. Përmbysja ishte fantastike, duhet të fokusohemi te finalja dhe kemi besim te fitorja.
Si është gjendja e ekipit përpara finales me Goga Basket?
Ekipi u akomodua në Durrës, në mënyrë që të ishim afër me sallën ku do të zhvillohet ndeshja. Gjendja është e mirë dhe nuk shohim asnjë problem. Kundërshtari është i denjë dhe Kupa e Shqipërisë do të kthehet aty ku e meriton, në Shkodër. Shpresoj të bëjmë më të mirën, në mënyrë që të mos përsëritet ajo e djeshmja. Kemi fituar eksperiencë në ndeshjet e fundit, ndaj Vllaznia do të kërkojë fitoren në "Feti Borova".
Tifozeria shkodrane mbizotëroi dje, si pritet atmosfera në mbrëmjen e sotme?
Është e qartë tanimë se klubi i basketbollit ka një mbështetje të madhe, duke mbushur shkallët e pallateve të sportit. Në fund ndeshjet bëhen për spektatorët dhe rezultatet tona kanë afruar më shumë të tillë. Ndaj Teutës ishte një ndeshje e madhe dhe publiku i shumtë shkodran që kishte ardhur në Tiranë, e bëri këtë më spektakolare. Mbrëmjen e sotme pritet më shumë publik pasi edhe klubi ka vendosur në dispozicion transport falas.
A mundej Vllaznia të bënte më mirë në Ligën Ballkanike?
Sigurisht që po, mundësitë ishin. Dëgjoni, ajo është një ligë amatore dhe ne u futëm më shumë për eksperiencë. BIBL nuk ka qenë korrekte, sepse na u tha që do ishte një garë me dhjetë ekipe, ndërsa në fund nuk përfundoi as me gjashtë. Kemi qenë klubi më serioz duke paguar të gjitha detyrimet, aqsa nga pala organizative nuk janë treguar korrektë. Na kanë premtuar transmetim të mirë dhe më shumë bazë materiale, gjë që nuk ka ndodhur. Kemi mundur Academia Bultex, gjë që nuk e kanë bërë të tjerët dhe mendoj se eksperienca do na shërbejë. Për të mos përmendur problemet organizative nga BIBL. /Stavro A. Dhimitri/
Lexo gjithashtu
