
Harry Kane është në qendër të vëmendjes, ende pa u çelur merkato e verës. Sulmuesi anglez ka kontratë me Tottenham deri në verën e vitit 2024. Ai pëlqehet nga Manchester United, megjithatë transferimi i tij në “Old Trafford” duket i vështirë për shkak të kostos së madhe financiare.
Kësisoj, drejtuesit e “Djajve të Kuq” kanë nisur nga puna për të gjetur ndonjë lojtar tjetër me aftësistë e shtatlartit të Tottenham. 115 milionë euro për transferimin e Kane janë relativisht shumë. Në këto kushte opsionet e tjera janë dy. “Daily Mail” raporton se në objektivin e United janë Victor Osimhen dhe Dushan Vlahoviç.
Të dy janë ndjekur prej kohësh nga United dhe mund të largohen në merkaton e verës, përkatësisht nga Napoli dhe Juventus. Napolitanët e vlerësojnë yllin e tyre për shifrën e 130 milionë eurove, ndërsa “Zonja e Vjetër” vështirë ta lëshojë pa 80 milionë euro. Pritet me interes të shihet se cilat do të jenë zhvillimet në merkaton e verës në klubin anglez.