Redon Xhixha dhe Xhuliano Skuka ishin thjeshtë të pandalshëm në Superiore. Dy sulmuesit shkëlqyen me Tiranën dhe Partizanin duke shënuar gola ndeshje pas ndeshje, më saktë duke shënuar dopieta e tripleta ndeshje pas ndeshje.
Xhixha ishte protagonist absolut në 1 sezon e gjysmë me Tiranën duke fituar titullin kampion si dhe duke e lënë në vendin e parë kur u largua. Situatë e ngjashme edhe me Skukën, i cili ndihmoi jashtë mase Partizanin me golat e tij në gjysmën e parë të sezonit të fundit ku të kuqtë u shpallën kampion.
Në total, Xhixha me Tiranën shënoi 32 gola e 7 asiste në 55 ndeshje, ndërsa Skuka 23 gola e 8 asiste në 46 ndeshje me Partizanin.
Largimet e tyre mbushën arkën e klubeve, por ‘boshatisën’ nivelin e cilësisë në ekip. Klubet humbën shumë në aspektin futbollistik, poashtu edhe lojtarët. Aventurat te Qarabag për Xhixhën dhe Metz e Maribor për Skukën nuk po ecën në ritmet e duhura.
Për Xhixhën mund të themi se e ‘kalon klasën’ teksa në 35 ndeshje, shpeshherë si zëvëndësues, ka shënuar 7 gola e 4 asiste në një periudhë që ka kaluar edhe 2 muaj dëmtim.
Ndërsa, për Skukën situata është më e përkeqësuar. ‘Mister 1.4 milionëshi’ rezultoi një dështim te Metz duke luajtur vetëm 9 ndeshje nga stoli dhe 1 ndeshje me ekipin B ku shënoi edhe gol. Këtë verë dibrani u huazua te Maribor në Slloveni dhe në 18 ndeshje ka shënuar vetëm 2 gola e 1 asist, shumë pak për një sulmues si ai.
Lexo gjithashtu
