Alonso drejt braktisjes së Formula 1, i lodhur nga ndryshimi i rregullave

Piloti spanjoll i Formula 1, Fernando Alonso, duket se po mendon seriozisht tërheqjen nga sporti të cilit i ka kushtuar gjithë jetën e tij. Ai duket i zhgënjyer nga ndryshimi i shpeshtë i rregullave në F1, të cilat po e bëjnë atë një sport që nuk dhuron më kënaqësi për pilotin.

“Këto ditë Formula1 po përjeton shumë ulje-ngritje dhe për shumë gjëra drejtimi ku po shkon është i paqartë. Nuk jam aspak i lumtur me disa gjëra, ne kurrë nuk mund ti japim makinave deri në limit, ne kurrë nuk mund të sulmojmë sa duam pasi gomat nuk të lejojnë. Nëse ecën shumë shpejt, ato nxehen dhe humbasin stabilitetin, nëse shtyn motorrin shumë, do të kalosh parametrat e konsumit. Që të jesh i shpejtë në Formulën e sotme, të duhet të mos sulmosh shumë , ky është sekreti, por kjo shkon kundër instiktit të një piloti”, thotë Alonso.

Ai shpreson që rregullat të kthehen siç kanë qënë për sezonin 2017, ndryshe do të largohet nga Formula 1.

“Shumë gjëra do të ndryshojnë vitin tjetër, le të shpresojmë se kënaqësia e pilotimit të makinës do të rikthehet në një faktor madhor. Nëse shikoj se Formula 1 shkon në një tjetër drejtim tjetër në krahasim me atë që njoh unë dhe me të cilin jam dashuruar në të kaluarën, në atë pikë do të merrja në konsideratë alternativat e tjera dhe do ta lijë Formula 1.  Le Mans do të ishte opsioni më pranë stilit tim, por edhe garat e Indianapolis janë shumë tërheqëse”, sqaroi spanjolli.