30 Milionë euro për Miralem Pjaniç

Drejtuesi i “Zonjës së Vjetër”, Beppe Marotta, ka qenë në Romë ku është takuar me drejtuesit kryeqytetas Romas kërkon 38 milionë euro, por marrëveshje mund të arrihet për 30 milionë, bazuar edhe te dëshira e futbollistit. Janë orë vendimtare për Miralem Pjaniç te Juventus. Gjatë ditës së sotme, Beppe Marotta ka qenë në Romë ku është takuar me drejtuesit verdhekuq për të marrë mesfushorin boshnjak. Drejtori sportiv i “Zonjës së Vjetër” kërkoi një ulje të çmimit prej 38 milionë euro që Roma i ka vënë futbollistit dhe kjo do të thotë se bisedimet zyrtarisht kanë nisur. Nga ana e tij, futbollisti që sapo ka mbyllur pushimet në Ibiza, ka arritur marrëveshjen me klubin bardhezi, por  Juventus duhet të bindë drejtuesit e Romës, të cilët kanë nevojë për para, sidomos pas dëmtimit të Rudiger. Klauzola për prishjen e kontratës së Pjanic me Romën është 38 milionë euro, por kryeqytetasit ka të ngjarë të zbresin deri në 15% pretendimet financiare. Kështu, për rreth 30 milionë euro Pjanic do të jetë përforcimi i duhur për “Zonjën e Vjetër” dhe trajnerin Allegri. Pak ditë më parë, pronari i Romës, James Pallota tha se Pjanic është i pashitshëm, por fakti që drejtuesit e Romës janë takuar me ata të Juventus tregon se me ofertën e duhur gjithçka mund të arrihet. Beppe Marotta ndihet “i fortë” nga fakti që dëshira e futbollistit është të luajë në “Juventus Stadium” gjatë sezonit të ardhshëm.