Zbulohen ditët në Serbi për Tiranën, ja programi për bardheblutë

Klubi bardheblu sezonin e shkuar e kreu fazën përgatitore në Mavrovë të Maqedonisë, por këtë vit preferenca e Tiranës nuk do të jetë sërish ky vend. Te 24-herë kampionët e vendit kanë menduar Serbinë si destinacionin e radhës për të zhvilluar fazën më të nxehtë të përgatitjeve.

Moment nga stërvitja e Tiranës në Mavrovë

Zllatibori, një vend mes maleve dhe me ajër të pastër është pikërisht pista ku do të kryejnë 21 ditë stërvitje të besuarit e trajnerit Ilir Daja. 24 herë kampionët e vendit do të lënë Tiranën më 17 korrik dhe do të kthehen më 7 gusht për të nisur më pas dhe përgatitjet për kampionatin në vendin tonë.

Në Zllatibor mësohet se ka një numër të madh skuadrash dhe po shihet për kundërshtarët e mundshëm. Miqësoret dhe përcaktimi i tyre i është lënë në dorë zëvendës trajnerit të Tiranës, Ivan Gvozdenoviç, i cili e njeh mirë ambientin në Serbi. Sa i përket merkatos, bardheblutë do të jenë të kompletuar deri më 16 korrik, kështu që nisja do të bëhet me numër të plotë kontingjenti dhe pa lënë hapësirë për të bërë prurje gjatë fazës përgatitore.