Të gjithë sportdashësit mund ta mbajnë mend ndeshjen e Partizanit kundër Flamurtarit në transfertë, ku të kuqtë triumfuan minimalisht 1-0 me autogol të shënuar nga Lorenc Trashi. Mëngjërashi ishte asokohe në qendër të kritikave për shkak të së shkuarës së tij me të kuqtë, duke qenë një nga lojtarët e preferuar nga tifozët.
E megjithatë prej tetorit deri në mars, kanë kaluar shumë ditë dhe çudia më e madhe në Shqipëri, 2 ditë zgjat. Ai gol u harrua dhe tani skenën e ka rrëmbyer fusha e Adush Muçës me protagonist sërish gramshiotin. Penalltia e shkaktuar me Bylisin në minutën e 97-të e ka përjashtuar atë nga Flamurtari, një ngjarje e paprecedentë në futbollin shqiptar teksa akuzohet se me dashje ka ndikuar në rezultatin e takimit.
Siç është shkruar dhe raportuar në media, përjashtimi nuk ka marrë trajtë zyrtare, por deri tani është në fazën e komunikimit verbal mes palëve. Një nga lojtarët më të mirë të viteve të fundit në rolin e tij duke u shndërruar në të pazëvendësueshëm e sheh veten në moshën 33-vjeçare të kryqëzohet në rrjet për një moment që të vërtetën mund ta dijë vetëm ai. Se si do të shkojë kjo situatë, mbetet për t’u parë në vazhdim.
Lexo gjithashtu
